MonsterBeez邊聽歌邊歎包

組合MonsterBeez成員Hailey C.（陳俞希）和Annie G.（吳燕安） 愛吃漢堡包，今次走到中環發掘充滿特色的漢堡包，中環多外國人聚居，區內有不少賣漢堡包及薯條的西式餐廳，要找有特色的漢堡包並不容易。擁有一半西班牙血統的Annie G.提到漢堡包時說：「我平時鍾意食西餐多啲，一開心就好鍾意食Burger、薯條。」

她們最近忙於打碟，置身於充滿音樂氣氛的餐廳時齊說：「雖然依家係下晝，但播住Live Band嘅音樂都已經吸引好多外國人嚟坐吓、傾吓偈，幾Relax！」Annie G.又說：「夜晚有Live Band實好High！不過有埋我哋打碟一定仲正！」勤於練習打碟的她們近日打算學樂器，Annie G.說：「我想打碟時可以有屬於自己嘅音樂，有自己嘅Style。學打碟已經一年，想嘗試多啲變化去打造自己嘅音樂，近日亦勤於學跳舞，希望邊打碟邊跳舞，令現場氣氛更High。我哋一路跳一路打碟，自己都會投入啲！」

中西合璧惹味

外國連鎖餐廳坐落香港，亦有富中國風味的選擇，Annie G.說：「個漢堡包入面有叉燒汁同豬肉鬆，完全唔似外國食物。」面對一枱炸物大拼盤，她們不期然眼睛發亮，Hailey C.指着大拼盤說：「個汁好好味，每個菜式都配一個汁，好細心。」二人一齊選擇炸魷魚圈，Annie G.說：「個炸魷魚圈外面好脆，熱辣辣！」

位於機鐵站的快餐店地方隱蔽，二人同聲說：「我哋一直都唔知呢度有餐廳，第一次嚟都用咗好多時間先搵到！」 兩人同樣要花一段時間才找到快餐店，餐廳有個別特色才有機會留住客人。由於Hailey C.不吃牛肉，於是就向素菜包埋手，她說：「呢度啲漢堡包即叫即整，好新鮮！素菜包嘅扒好有肉嘅質感，好似食緊肉咁！」素菜扒由蔬菜切碎，與街外的素菜包不同，沒有加入豆腐，口感更似肉質。Hailey邊食邊說：「呢個包中間塊扒唔會好碎，又唔太油。」

啖啖肉唔怕肥

Annie G.亦快手向另一個漢堡包進攻，並邊食邊說：「好特別！中間有片菠蘿，好Fresh！即使中間有塊咁厚嘅肉都唔覺好膩！」她愛嘗試特別的配搭，啖啖肉的漢堡包並未有令她卻步：「依家成日跳舞都可以消耗熱量，有時忍唔住食多少少都唔怕。」果然典型鬼妹仔性格的Annie G.不怕食太多，有時想食就食，想瘦都不一定要節食。

漢堡包演變

漢堡包是由德國和美國流入本港，經歷多年的變化，香港亦演變出自家方程式，增加不同配料，迎合本地的口味。即使國際連鎖店亦會特別為每個國家的分店設計融入當地特色的菜式，吸引本地食客。為配合健康飲食潮流，餐廳紛紛推出素菜漢堡，坊間不少餐廳經常使用豆腐作素菜扒的材料，但不少人怕豆腐的豆味，用切碎蔬菜的素菜扒可以提供另一選擇。

食後感

畢竟漢堡包和煎炸食物卡路里高，但很多時都難以抵擋美食誘惑，女仔食完自然怕肥。愛吃的Annie G.自言易肥，有時難敵美食誘惑，她說：「晏晝食多咗，惟有夜晚忍口，通常一忍口，會好易覺得瘦咗。」她指終極瘦身的方法是戒飯，轉食米粉或麵及勤做運動，雙管齊下。有舞蹈底子的她一星期會上四堂跳舞課，她說：「跳舞真係瘦得好快，其實一個禮拜一堂都見效。」