黃奕瞓身喪打一路震一路劈

內地女星黃奕於電影《競雄女俠－秋瑾》孭重飛，拍攝時打到手震，但仍堅持手執大關刀繼續大劈特劈。開拍前，監製冼國林坦言曾考慮過不少知名女星，但最終還是覺得她最適合！

繼口碑之作《葉問前傳》後，監製冼國林與導演邱禮濤再度合作，拍攝新戲《競雄女俠－秋瑾》。為拍好該片，兩人花盡心機選角，冼國林揚言初期曾考慮「雙冰」李冰冰、范冰冰及周迅，但最終揀選了黃奕！談到箇中原因，冼國林說：「李冰冰同周迅嘅年齡唔係咁適合，范冰冰就外形太艷，所以最後選咗黃奕。」

事前習武半年

《競》片是一部投資逾五千萬元的大型電影，影片以女主角「孭重飛」，如不找頂級女星擔大旗，當然要冒一定風險，但冼國林不認同：「我覺得只要劇本好同製作好，一部戲反而能夠帶紅一個人！之前已經有好多好好嘅例子，我搵黃奕嘅原因，除咗佢嘅外形好合適之外，佢仲願意花半年時間，去學功夫同練騎馬，呢一樣嘢就唔係個個女星都能夠做得到。」

黃奕事前花了半年時間學武，拍攝期間更加瞓身喪打，打到手腫腳瘀已是等閒事，冼國林說：「除咗經常打到瘀晒之外，我曾經見過有一次，黃奕打到連揸杯都手震，原本可以搵替身拍下一個鏡頭，但佢堅持自己繼續打，仲要拎住一張好大把、好重嘅關刀拍打戲，一個弱質女子可以做到咁，我真係好欣賞。」