黃宇詩搵老公帶眼識人

黃宇詩正忙於綵排舞台劇《中女解毒》，已踏入「中女」之年的她無懼世俗的閒言閒語，坦言不會因為年紀漸長而心急拍拖或結婚，反而要慢慢尋找真命天子！

黃霑女兒黃宇詩將演出由鍾燕詩編劇和執導的舞台劇《中女解毒》，對於「中女」一詞，她坦言最初未能接受到這個「貶義詞」，覺得有點反感：「隨着社會改變，開始接受到呢個比喻，所以我哋會喺劇入面為中女發聲，講番自己嘅心聲，同埋喺社會上遇到嘅情況。」問到會否因踏入中女階段而心急拍拖或結婚？她說：「梗係唔會！反而我覺得年紀漸大，要慢慢睇清楚先去搵另一半，我又唔係冇自己事業，社會上有個位喺度，仲企得住。我目標又唔係做家庭主婦，又唔係要嫁個有錢人，呢個唔係我人生目標，我根本唔急。」

跳舞色誘男仔

對於早前被指做了「第三者」，黃宇詩否認報道所說，澄清對方只是課堂上的同學：「報道對我同朋友都有影響，我係會約不同嘅異性朋友出街，嗰次只可以話畀人影咗係唔好彩！我根本一早知佢有太太，大家只係朋友，最唔開心係報道寫埋我父母以前嘅事，真係好唔開心！」

劇中，黃宇詩的角色有很大的變化，導演鍾燕詩指平時見到她斯斯文文，今次見到她發放真實一面，還要她跳舞引誘男仔。對此，黃宇詩說：「今次真係覺得有少許人格分裂！其實每個人有不同嘅一面，只係你願唔願意拎出嚟畀人睇，我唔介意畀人見到我調皮一面。」