尹子維識「食」一夜情溝女星

藝人兼歌手尹子維原來是「大食家」，經常落Club玩一夜情，亦試過因此而在圈中找到真愛，但也有不少「唔認真」的感情！

近日簽約好友吳彥祖唱片公司的尹子維，將於下月推出新碟，是他相隔11年後再次出碟，大碟概念來自他的男歡女愛經歷。外形花弗的他，曾在電影中不止一次演鹹濕奸角，但現實中可有經常換畫？他說：「我認真拍拖得五次！（唔認真呢？）我接受一夜情，新碟亦會有一首歌講呢樣嘢，叫《瞬間初夏》，係講一種一朝早起身，原來身邊個人係同你冇希望，只係令你有逃避現實嗰種感覺。（試過咁樣搵到真愛？）有！唔止一次。（行內定行外？）都有。」他表示不公開女友身份，原因是公開權不在他手上。

與貝安琪屬好友

提到他曾被拍到與名模貝安琪在萬聖節Party激咀，子維強調兩人分屬好友，問到有否將兩人關係表達在歌詞中？他說：「冇直接咁寫，有套戲叫《Closer》，講一對情人，一個浪漫，一個實際，我有首歌係寫呢樣嘢。（你同貝安琪就係咁？）唔係！都冇拍，如果拍拖唔會隱瞞。」

子維坦言一生中有很多不認真的感情：「香港係大都會，咁樣係唔出奇，因為全世界都係咁，但喺美國反而冇想像中咁開放，因為嗰邊有好多教徒，蒲完會有罪惡感。」