呂晶晶狂Ban飯局搵銀靠自己

亞姐呂晶晶近年經常接拍內地劇集，密密賺「人仔」，她坦言入行以來曾被問飯局價，但遭她一一拒絕：「靠自己搵錢好過！」

早前有不少香港女星被問飯局價，呂晶晶不諱言由選美以來，已開始有人問她：「起初係一個年紀大嘅男人打嚟，佢話叫我出去食飯，幾萬蚊夠唔夠？我話唔做呢啲嘢，佢仲問我係咪唔夠，叫我開個價！另外有一個女人，4年來用唔同嘅電話打畀我，佢又好留意我啲新聞，又話我同邊個分咗手，又話我蠢，仲話唔鍾意食飯都得，去睇Fashion Show都可以介紹人畀我識！佢問我見面禮幾十萬嘅手錶夠唔夠？我即刻話唔去，叫佢唔好再打嚟，佢先收手咋！（幾十萬你都唔心郁？）接多幾套內地劇，靠自己搵錢好過啦！」

拍亞視劇少賺6位數

另外，晶晶早前完成鄧特希監製的劇集《親密損友》後，現時與亞視只有部頭約，近年大部分時間拍攝內地劇的她，將到福建拍攝古裝神話劇集《媽祖》，擔演第二女主角：「今次係我第二次拍古裝劇，我未試過拍劇吊威吔，只係拍一個洗頭水廣告時吊過，足足痛咗幾日！其次我都擔心到時內地會好凍，所以度身訂造羽絨！之前我減肥瘦咗12磅，脂肪比率超低，特別怕凍！」

晶晶不諱言之前為拍《親》劇而推掉不少內地劇，令她損失不菲：「冇咗最少6位數字，估唔到套劇拍咗5個月，據聞出年年頭會出街！」