Alice B. 為錢途冇情講

混血甜心Alice B.來港發展兩年，至今仍未找到一位「啱口味」的香港男友，原來是她覺得行騷搵錢最重要，即使有時間都寧願返倫敦探親享天倫樂。

今年21歲的混血甜心模特兒Alice B.自言後生有本錢，寧願搏殺搵銀，都不急於找男朋友，她說：「依家仍然單身，雖然有追求者，但大家年紀相差太遠，價值觀又唔同，好難令戀情開花結果。我得21歲，應該專注工作，有好多嘢要試。可能因為佢年紀大過我，會諗組織家庭同之後嘅嘢，但我未係時候講結婚。」她希望將來能找一位志趣相投的男朋友，亦不介意對方國籍：「大家要有共同興趣和話題，好似要鍾意畫畫，唔係會好悶。」

萬聖節倫敦探親

留港期間，Alice B.經常相約朋友出外聊天輕鬆一下，但仍會掛念倫敦的家人，她說︰「我打算月尾放幾個星期假返倫敦，好耐冇見屋企人，我姊姊有咗男朋友，想見吓面，不過唔會叫佢男朋友介紹男仔畀我識。今次倫敦之行仲會去Shopping買鞋，因為自己腳大，喺香港好難買鞋。」除了倫敦外，Alice透露還會跟好友旅行。

Alice稍後返倫敦探親正值萬聖節，她表示會去Party慶祝，問到會否以性感打扮出席？她說︰「未諗到着咩，想要特別造型。我唔會打扮成性感醫生或者魔鬼，因為同萬聖節扯唔上關係。」