蔡少芬做侍婢 出山惡鬥雯女

經典系列《金枝慾孽2》將於明年開拍，連日來無綫正為該劇拍節目巡禮，林保怡在第一輯的孫白颺角色備受觀眾喜愛，惟他尚未答應演出，監製戚其義幸得愛將蔡少芬「出山」接演，更願做「帶女洪娘」抱着黐身的女兒四出拍外景。

蔡少芬（Ada）、陳豪、鄧萃雯和苟芸慧等，昨晚在電視城拍攝《金2》巡禮片段。錯過演出第一輯的Ada，今次飾演侍婢角色，她笑言監製可能想她由低做起，如演王后則沒有新意。劇中Ada將與雯女有很多對手戲，過足戲癮。

早前Ada老公張晉雖曾向外透露她要停工湊女，但戲癮大的Ada昨晚為《金2》拍攝時表示，未生女前已跟無綫簽了三部劇，並指如果《金2》是40集的話，她已當完成兩部劇的合約。據知外景將到北京等地拍攝，問到如何照顧女兒？Ada說：「帶埋佢去囉！個女又未讀書！但我尋日入嚟拍部分片段時，個女都喊咗兩個鐘，我老公傳咗張相我睇都好心痛！但亦好開心，證明個女冇咗我唔得！但我唔可以唔做嘢，呢啲情況我都要經歷！（冇被挖角？）未生女前已簽，我唔會因為挖角而乘機向無綫要求加人工！」有女萬事足的她昨日更在微博上載寶貝女楚兒套着尿布袋的趣致相片。

陳豪避睇女友露Bra

首輯林保怡與佘詩曼的角色甚得觀眾喜愛，但兩人是否拍攝尚屬未知數，但有份演出的陳豪卻指兩人缺一不可，還笑說可能他們會拍：「邊個演其實我唔知，但希望個劇可以延續到個勢，我冇壓力！（會睇女友陳茵媺喺《法證III》嘅露Bra場面？）佢之前有同我講，雖然支持，但我都會跳過呢段唔睇！」而雯女笑言拍得巡禮都會落實演出，問到是否因《巾幗梟雄》系列新作被傳「胎死腹中」，故接《金2》？她說：「唔係！係阿戚搵我先啫！我同無綫有約o架！（會調整薪金？）我唔係外援，我唔信會再調整，做嘢唔係講錢嘅！（王維基搵你？）冇，合約係商業秘密。」