財困瞞好友Dicky：佢寧願自己捱

張衞健（Dicky）與Edmond是當年華星出身的新秀歌手，相知相識超過十數載，交情親如兄弟，但原來Edmond「破產」，Dicky全不知情，直至閱報得知好友的名車因斷供被拖走，才知事態嚴重。

Dicky接受長途電話訪問，談及往事時說：「Edmond就係啲咁嘅人，自己有事自己解決，解決唔到寧願自己去捱，唔會出聲o架！（咁你點幫佢？）冇乜點，咪開張銀碼都唔小嘅支票畀佢囉，但幾多錢真係唔記得，都唔方便講。（有冇擔心佢唔接受好意？）咁又冇，男人老狗冇乜好擔心。」

最緊要撐番起

經過此事，Dicky對好友有更深層次的體會，大讚Edmond是「窮得有骨氣」，皆因他借錢給Edmond不久，對方已開始還錢：「我知佢仲喺經濟唔係咁好時，佢都堅持還錢，我都叫佢唔好急，但佢死都要還，有次同佢食飯之嘛，佢又塞張支票畀我。」Dicky謂過往多年，幫友人江湖救急無數次，但大部分「一借冇回頭」，但Edmond卻是有借有還的「上等人」。

除了金錢上施援手外，Dicky亦曾以「過來人」的經歷勉勵好友：「我都同佢講，佢哋好景時日日有工開，但我嗰陣整整一年都冇工開，個人好沮喪，又要養家，好彩之後喺台灣同內地拍劇『彈』起咗！」故他常勸Edmond不要氣餒：「谷底唔怕跌，最緊要有力撐番起。」