容祖兒蛻變樂活

在樂壇打滾逾10年的天后容祖兒，經過年初的「悠長假期」後「三開」：開竅、開懷、開心！至於林欣彤雖萬千寵愛，惟她並不自滿，渴望獲得認同。當最受歡迎女歌星遇上最愛矚目女新星，譜出的是真摯之「彤」言「容」語。

破紀錄6奪最受歡迎女歌星獎的容祖兒，與不少人一樣，也經歷過「樽頸位」，尤其是去年叫好叫座的演唱會，更令她感到無比壓力。事隔差不多一年，當時的情景，祖兒仍歷歷在目，她說：「去年嘅演唱會畀自己嘅壓力真係好大，超乎自己想像，壓力大到令自己失聲。我成日諗點樣超越08年嘅《Starlight演唱會》，當年冇諗過有咁好反應，所以令上年嘅個唱未算做到最有信心，惟有用誠意去彌補聲線不足。」

感激朋友開解

完成演唱會及年初各大樂壇頒獎禮後，祖兒向公司請假「出走」三個月，一個長假令她再度長大，人也變得開竅、開懷、開心！她說：「放假期間，好似一次過將啲病菌發晒出嚟，好彩有同朋友傾偈，得到佢哋開解，自己個心都放開咗，釋放體內『毒素』，令自己沉澱，成功將問題解決，冇咁耿耿於懷，仲感受到朋友關愛，自己開懷咗。」

現時的祖兒也勇於求變，但不會刻意追求：「因為若然唔識抒發，會好易形成鬱結，當然有轉變係好事，由一道門去開另一道門，好似去咗另一個領域。」由09年至今，她已有足足兩年沒有推出個人大碟，過往兩年亦只推出EP「慰藉」歌迷，至日前才推出大碟《Joey & Joey》，歌曲《花千樹》及《牆紙》迅即熱播。

新碟細唱感動

祖兒表示今張專輯Back To Basic：「我依家諗嘢簡單好多，連揀歌都冇乜顧忌，最緊要知道自己最擅長係乜，同埋鍾意就得。早兩年，我想搵另一個自己，點知變咗『樽頸位』，好多嘢變成例行公事。」她更學懂放慢腳步：「今年絕對係開竅嘅一年，無論對工作、傳媒以至生活都自在咗好多，搵番唱歌樂趣。我攞過好多獎，但最想攞始終係最佳大碟獎，因為呢個係Team Work，係成班音樂人嘅心血。」

聲線是歌手的「搵食架生」，祖兒難忘失聲的慘痛經歷：「唱歌最緊要係把聲，因為每首歌都係一個劇本，我好似一個演員，照住份歌詞代入角色。依家嘅演繹方法，唔會刻意追求高難度，有時過於琢磨、吹毛求疵同一絲不苟，反而增添壓力，所以寧願以真誠、真摯嘅感覺去打動人心。」對於小師妹林欣彤加盟英皇，祖兒認為樂壇需要新鮮感，並表示一直有留意她，更曾錄恭賀短片歡迎她加盟。

後記︰錄音零干擾

為了這張久違了的大碟《Joey & Joey》，祖兒特意作出調節，改變錄音習慣，她說：「以前一直習慣手機不離身，就算錄音都係，但今次為咗專心錄音，冇人搵到我，連手機都唔帶入錄音室，令自己更集中唱歌，頓時覺得空間大咗。」