郭羨妮關島嫁 開Turbo造人

郭羨妮（Sonija）與莫文蔚昨日搶閘做十月新娘，Sonija更搶先在微博宣布「我們結婚了」！據知，她婚後將全速造人，生仔也要快人一步！梁詠琪與Selina等亦相繼在不同地方結婚，娛圈可說喜事重重！

不少娛樂圈「剩女」近年成功搵到好歸宿，其中大多玩「閃拍」、「閃婚」。現年37歲的Sonija去年七月北上拍劇時認識內地武指朱少杰，直到今年2月被本報獨家披露戀情。兩人相戀約半年即傳出婚訊，但她一直保密婚期及出嫁地點，令外界諸多揣測。不過，嫁期昨日終揭盅，Sonija昨晨10時28分突然在微博公告喜訊，比在意大利佛羅倫斯結婚的莫文蔚更早，並上載與老公結婚照。

穿上白色低胸婚紗的Sonija一臉幸福，與老公深情對望，背景則是一片藍天碧海，她說：「今天，我們結婚了！」迅即獲大批好友及Fans祝福！據知，Sonija在關島行婚禮，只邀請親友，未有圈中人，貫徹她想在小島完婚的心願。

下月大宴親朋

無綫高層樂易玲昨日在電話受訪時透露，幾日前才與Sonija聯絡：「其實Sonija仲拍緊劇，但因為劇集監製係佢老公朱少杰，所以檔期較易遷就。佢上月28號返過嚟香港試婚紗，當時仲有傾談婚事問題。」樂易玲還踢爆兩人將於11月在內地大宴親朋：「今次佢只係想同屋企人分享喜悅，之後會返北京繼續拍劇，遲啲先喺內地大宴親朋戚友。至於佢同無綫嘅合約仲有一段時間，所以會繼續中、港兩邊飛。佢嘅感情兜兜轉轉，依家終於搵到個有本事嘅錫佢，為佢有幸福而感恩。」她又祝願Sonija早日生BB，並透露對方早已做好準備：「我叫佢有仔趁嫩生，最好三年抱兩，佢仲研究緊喺香港、內地抑或加拿大生好？但Sonija希望留喺香港生，因為郭媽媽可以幫手照顧BB同陪坐月，仲可以接多啲商場騷同搵贊助，因為佢事業心仍然好重。」

女星排隊結婚

除了Sonija與莫文蔚外，其實不少圈中女星排隊出嫁，並選擇在各地不同地方。其中現年35歲的梁詠琪便於明天在西班牙與男友閃婚；36歲的李玟則選擇香港擺超豪盛宴；快將30歲的Selina與33歲的林嘉綺亦會在台灣結婚，一班年逾30的女星紛紛趕住嫁，告別單身生活！