Charlie耍太極拒洩蜜

梁詠琪為保護這段「中西」異國戀，低調舉行婚禮，只邀請小部分圈中人出席，身為好姊妹的楊采妮昨日起初否認傳聞，後來轉口風表示不便回應，為好姊妹的人生大事保密！

梁詠琪（GiGi）、楊采妮（Charlie）、李心潔及許茹芸（琇琇）向來情同姊妹，經常「四朵金花」一齊做慈善活動，據知三女將會分別在不同地方各自出發到西班牙親賀老友！對於婚訊突然爆出，三姊妹都採取封口措施，冚得有咁密得咁密，認真老友！

Charlie昨午出席慈善活動時，被問到GiGi的婚訊，她顯得非常愕然，並表示未有聽聞：「我不嬲都唔問人哋啲私人嘢，你哋最好問番佢！（你係咪3號飛去西班牙？）冇呀！3號喺香港都有嘢做！」隨後，Charlie晚上出席另一活動時，再被追問有關消息時，她突然轉口風說：「我真係唔方便回應！大家都知我哋係好姊妹，更加唔方便講啦！」當問到GiGi有否帶西班牙男友畀姊妹過目？她不置可否兼大耍太極：「以前心潔都有帶彭順出嚟……（係咪要過姊妹關？）我哋大家感情事都好尊重大家！」

李心潔置裝赴會

至於琇琇的經理人表示，不知道消息，但不肯透露琇琇的行蹤：「真的不曉得！藝人的行程也不方便透露！（送上祝福？）如果有朋友談戀愛，一定會開心！」而本報則拍到李心潔日前於中環行街，不停搜羅貴價靚鞋，未知是否為赴婚宴而入貨呢？據知她現時身在韓國趕戲，相信當日才能趕赴歐洲賀好姊妹。