草蜢操肌 腩肉零增長

跳舞組合草蜢自26年前入行後，身形長年Fit爆，腰圍長期保持28吋左右，蔡一傑在近期的紅館騷中半裸大晒肌肉又着短打激凸，原來他們多年來一直做運動Keep Fit，實行保持最佳體態及「型」態做騷！

草蜢身形多年不變，與同齡發福的「中男」比較完全是兩回事，問他們何以如此神奇？擁有完美Body的蔡一傑（傑仔）表示他們幾十年來腰圍都是28、29吋，幾乎沒有肥過，故着衫着得好睇，傑仔說：「衫係死嘅，重點係個人着得套衫型！件衫幾貴，着得唔好睇都冇用。（有傳你哋一年賺千萬，所以啲衫咁貴、咁靚！）有就好喇！」

問他們為何如此有型？原來他們多年來都Keep住做運動，身形很Fit的蔡一智（阿智）說：「運動係我哋嘅娛樂，一星期有4、5日都做運動，跑步、行山、做Gym，而且同屋企人一齊行山係非常好嘅親子

活動！」

戒口保「型」態

問他們有否注意飲食？操開肌肉的傑仔表示已經戒掉所有零食、糖；而食極唔肥的阿智說：「我全部都食，不過食少啲。」蘇志威則笑言不會戒口，做人最緊要開心，但演唱會前還是會戒口，力保零肥肉的體魄！