周家蔚甜到漏改嫁期

計劃今年拉埋天窗的洪天明與周家蔚出現「婚變」，需更改婚期，因天明要到內地拍劇搵人仔，故押後至12月中在港行禮，明年補擺喜酒，家蔚冧爆說：「佢咁努力搵錢養我，點都要放人啦！」

洪天明和周家蔚計劃今年拉埋天窗，婚禮由最初構思到馬爾代夫小島進行，其後因工作及場地安排轉為「六條一」2011年11月11日到澳洲舉行「二人婚禮」。不過，婚禮臨近卻再押後至12月中在香港舉行，家蔚說：「因為天明最近接咗套內地劇《濟公3》，11月要去橫店開工，有嘢做梗係搵人仔先啦！佢咁努力賺錢養我，點都要放人啦！好彩之前只係預訂咗機票，其他嘢都未訂，所以都冇損失！」

每日煲電話粥

問到婚事一改再改可擔心天明「轉軚」？家蔚笑說：「梗係唔會！佢依家喺哈爾濱拍緊劇，每日都有打畀我，又話買咗啲咩送畀我、好掛住我，我好放心！」她又感謝雙方家長體諒他們再改婚期：「大哥（洪金寶）都喺內地拍緊嘢，最快要12月先得閒，冇人有投訴，我媽咪就當然想盡快啦！」而她近期亦開始為婚禮物色場地。

學做大家閨秀

另外，家蔚近期忙於拍攝無綫重頭劇《造王者》，首次拍古裝的她說：「之前煲《金枝慾孽》都有一定幫助，同鄭則士合作學到好多嘢，佢教我哋雖然係古裝，但係講嘢都唔使太過文縐縐嘅，最重要係自然，唔好畀觀眾覺得喺度背對白。」