近藤真彥悔冇跟阿梅學唱

闊別香港舞台25年的80年代日本超級偶像近藤真彥（Matchy），昨日坦言曾兩度來港拜祭已故舊情人梅艷芳，卻遺憾未有跟對方學唱歌。

現年47歲、第4次來港舉行演唱會的Matchy，穿黑白色西裝亮相記者會。他貴為日本殿堂級巨星，但全無架子，有問必答，笑容可掬。Matchy與獻花的小妹妹合照，主動蹲下及攬到實，又逗她笑。

踩囝囝唔夠靚仔

Matchy表示此行主要宣傳演唱會，無暇拜祭阿梅，但多年來曾兩度來港致祭，問到可懷念阿梅？他說：「當然懷念。」並稱聽過阿梅唱歌，大讚她唱功了得，曾想跟她學唱歌，可惜聽不懂阿梅的廣東話而作罷。

Matchy又指年約3歲的兒子年幼，不考慮帶他來港睇騷。問到兒子可有唱歌天分及可有計劃培養兒子成為巨星？他笑說：「兒子太細，未發現到佢有歌唱才華，但佢唔及我靚仔，培養佢成巨星應會失敗，所以冇呢個計劃。」當Matchy被讚身材Fit時即反問：「要我現時除給你看嗎？」又稱因後輩很年輕又靚仔，故要努力Keep Fit，更否認戴假髮。至於一天內分日、夜兩場，他揚言以前試過唱足九場，故連唱兩場絕無難度。