YoYo懵盛盛扭計等求婚

陳自瑤與王浩信拍拖已一段日子，據知小情人已有結婚大計，即將於港島香格里拉酒店舉行婚宴，並已籌備搬新屋，建設甜蜜小天地。

無綫藝員陳自瑤（YoYo）與王浩信是公開的一對，早前YoYo出席活動時被問到有否結婚計劃時，她詐嬌表示未有人求婚，希望33歲前出嫁。據知，浩信已秘密進行婚禮籌備，更在酒店訂酒席。記者昨日致電查詢，他說：「吓！點解會有人知？我係有咁嘅Planning，但我未正式同佢（YoYo）講，之前我都好多次同佢暗示想結婚，但佢好似仲諗緊咁，依家只可以話係求婚當中，佢肯答應先成事。」據知他倆已買樓並計劃搬離舊居，浩信說：「睇緊啫！係會搬，但唔係買！嗰度大啲，將來結婚都啱用。」

記者再致電YoYo求證婚事，她嚇至口窒窒，問到浩信是否已求婚？她說：「其實我未知，之前佢係一路有講，我當然要佢好好咁求婚，唔係齋講，都未有一個全面嘅行動。（未有戒指同鮮花？）未呀！佢做咗先啦！睇吓佢求婚過程啱唔啱我心水先啦！如果真係決定結婚，我會同大家講。（係咪好期待浩信求婚？）OK啦！不過佢有時都有啲驚喜畀我嘅！」

Phoebe堅守三點

此外，王浩信、許穎（Phoebe）及滕麗名前晚在將軍澳電視城錄影節目《變身男女Chok Chok Chok》。Phoebe打扮密實，問到是否不想效法死敵何佩瑜（Jeana）出鏡露點？她說：「咁核突，露點好不雅，性感都要做足安全措施，唔想效法佢囉！我堅守我三點o架！」至於與無綫尚有半年約的滕麗名透露，以王維基為首的城市電訊也有接洽她的經理人，但她認為無綫還是首選。