阿旦親手接生勁難忘

「E Cup教主」鄧伊玲（阿旦）養有一家五口的哥基小家庭，她憶述5年前經過寵物店時，見到哥基犬被欺負，頓生憐憫之心：「我見佢咁慘，心裏面講咗句：『如果你對我吠一聲，就帶你返屋企！』最後佢吠咗一聲，真係好似叫我帶佢走囉！」哥基女名為「雞髀」，與領養的哥基仔「叮叮」湊成一對。

兩年前，阿旦為「雞髀」用棉胎搭建產房，並與男友阿感親手接生7隻BB，順序取名為「東南西北中發白」，可惜最後一隻BB夭折，令她格外難忘：「阿感原本負責拍DV，可惜手忙腳亂掛住接生，最後影片有聲冇畫，淨係聽到叫聲！」她送了其中3隻狗仔給家人，其餘的則自己養，當中有隻狗仔的頸及身上都有英文字「E」的斑紋，與阿旦的英文名Elaine均是「E字頭」，難怪特別投緣！