周秀娜提星爺「黐黐哋」撞板

妖男歌手佐治童子前晚空降澳門打碟，學過打碟的周秀娜特地帶同一班師妹到場偷師，長裙上陣的她被谷胸熱褲搏到盡的何佩瑜（Jeana）截擊成功，提到黐星爺拍戲上位的傳聞時，她更突然失控撞落布景板！

周秀娜前晚在杭州拍戲後急急返港，漏夜帶同一班師妹包括何佩瑜（Jeana）、余曉彤（Hidy）及吳燕安（Annie G.）等過大海，前往澳門威尼斯人度假村「Club Lotus」，向80年代紅極一時的英國男歌手佐治童子朝聖，眾女更不忘即場露兩手。以露背透視黑色長裙示人的娜姐，被谷胸熱褲上陣的Jeana大搶「峰」頭，即被揶揄搵夠唔憂做，她反駁說：「我之前腳傷仲未好，所以要着長裙遮住，啱啱先落機就要趕嚟澳門，邊似搵夠！」

冇留意男友緋聞

近年轉戰影壇的娜姐，半數時間離港外出搏殺搵銀，留港的男友Avis卻屢傳有女埋身，她笑言甚少留意新聞，男友暫避一劫，在旁的Jeana即搭嘴：「有咩事會話你知！」娜姐表示跟男友拍拖多年，最重要講個「信」字。但當提到她黐星爺拍新戲上位的傳聞，她突然擰轉頭失控撞落布景板，神色尷尬，問到是否靠黐上位，她直認不諱：「確實黐黐哋，不嬲係佢粉絲，可以參與電影好開心！（會唔會愛上佢？）細細個已鍾意佢，男友都鍾意！（男友驚唔驚你愛上星爺？）佢唔驚啦！咁多女仔鍾意，都證明我有品味。」另外，Jeana早前被鄧伊玲（阿旦）寸似吹氣公仔，她表示自己太高很難整成吹氣公仔，或會考慮出攬枕。