陳豪搶視帝 打情侶牌拉票

視帝、后每年競爭激烈，賽果一日未揭盅，候選人不惜一切拉票。今年再度問鼎視帝的陳豪昨日使出「雙陳情侶牌」，首次夥拍緋聞女友陳茵媺以情侶檔出騷谷人氣，席上更甜蜜得儼如預演婚禮！

無綫小生陳豪與緋聞女友陳茵媺（Aimee）上月被本報踢爆通宵於新愛巢「蜜」會，戀情逐步浮面。「雙陳」愛情得意，事業亦如日中天，同樣有份爭視帝、后。Aimee未嫁入「豪」門已同聲同氣，日前力撐陳豪演技最好，望雙雙稱帝封后！

07年封帝的陳豪，今年要重溫舊夢亦有難度，除了面對06年視帝、於《怒火街頭》有好表現的鄭嘉穎與主演台慶劇《法證先鋒3》的黎耀祥外，林峯與謝天華亦不容忽視！「無綫親生仔」林峯今年有《花花世界花家姐》及《不速之約》兩劇揸手，至於謝天華主演的《潛行狙擊》叫好叫座，可謂勢均力敵。

不過勝負一日未分，候選人當然繼續落力拉票谷人氣，陳豪昨日更使出撒手鐧！從未以情侶檔示人的陳豪及Aimee，昨日分別穿上西裝白恤衫及白色斜膊裙，以襯到絕的「結婚禮服」姿態破天荒以情侶檔現身，出席於旺角舉行的《TITONI瑞士梅花錶香港旗艦店開幕》剪綵儀式。如今秘密武器「雙陳情侶牌」一出，除了能叫高騷價外，亦能確立「郎才女貌」的情侶形象，有助吸引其他廣告商以保持曝光率，提高爭獎機會。

公開戀情慢慢嚟

席上，兩人最初表現尷尬，企到離行離列，在記者起哄下要求錫錫及翹手，才願意企在一起合照。陳豪獲安排即場為Aimee挑選粉紅色腕錶，並細心地戴上，儼如交換婚戒一刻！難怪她冧爆表示「啱心水」！陳豪則全程甜笑，視線亦從未離開過女友半秒。

接受訪問時，兩人先齊聲講「Hello」夾到絕，陳豪表示開心以情侶檔示人，希望以後有更多機會，Aimee則說：「都幾好！（情侶檔收貴啲？）唔知收幾錢！」被問到若被客戶要求拖手，陳豪即叫好：「Good Idea！睇番客戶要求。（合照尷尬？）你哋囉！叫做呢樣做嗰樣，但都唔尷尬！（幫Aimee戴錶似交換戒指？）開心！因為幫客戶宣傳。（幾時公開戀情？）呢啲慢慢嚟！」