張繼聰撐老婆敢言
身為謝安琪老公的張繼聰，力撐老婆是個敢言的人，他說：「佢唔係唔知自己講乜嘅人，佢係一個好叻嘅人，識得衡量同評估，我喺佢身邊兩、三年，佢承受嘅嘢我最清楚，佢呢番言論唔係要攻擊任何人，只係想講個嚴重性，佢係屬於敢言，相對地對佢係蝕底咗。」
張繼聰表示有安慰老婆：「叫佢放鬆啲，有同佢講香港有言論自由，當你講完，就要容許聽其他人嘅說話，當然說話中有冇尊重就其次啦！」對於網友質疑謝安琪是傑青為何要說出粗鄙說話，張繼聰說：「我唔係要幫太太，雖然大家認為傑青講嘢要小心，但對佢好唔公平，佢都係見到情況咁惡劣，去提醒大家。」
他表示每人經歷不一樣，每個經歷都讓人成長：「我嘅角色係氹佢開心，兩夫妻係互相支持，呢件事都算雨過天青，我好感謝我哋經歷過呢啲嘢，知道唔好太過執着，要敬業樂業。」