固執Anjaylia任性Evelyn友得Fun

「友共情不變」這句說話正好套在口靚模陳嘉寶（Anjaylia）和蔡穎恩（Evelyn）身上，雖然一個固執，一個任性，又各有喜好，但這種負負得正的化學作用，卻鞏固友誼，即使Evelyn早前有感情煩惱，但有Anjaylia在旁，聽到的都只是笑聲！

記︰記者　A︰Anjaylia　E︰Evelyn

曖昧友情

記 ︰你哋兩個識咗幾耐？

A ︰識咗幾年！08年7月識定09年8月呢？等等先。

E ︰係08年呀！阿豬，咁冇記性。

A ︰係呀！08年8月頭識嘅。

記 ︰記唔記得大家送畀對方第一份禮物係咩？

A ︰（搶答）我記得！第一次送嘢畀佢係台灣手信。

E ︰我都記得，佢太容易畀人記得佢鍾意啲咩。

記 ︰點解Friend咗？

A ︰順其自然o架！

E ︰唔知呀！真係唔知！（笑）嗰時我哋無啦啦傾電話，跟住突然傾咗3個鐘，突然好Friend，大家好多嘢講，講真佢係我入行第一個識嘅行內Model！

A ︰可能大家同公司，工作同路線相似，大家嘅嘢相似，而且年紀又差唔多，佢80後，我90後……

E ︰（激動）唔係呀！佢只係細我一個月（笑）！

A ︰我唔係好介意年齡，OK呀！同啲姐姐相處。

記 ︰點樣形容你哋關係？超越好朋友？

A ︰（笑）好似好曖昧咁！

E ︰應該咁講，我同Anjaylia有啲位我唔需要解釋，好似我話「其實呢我咁」，佢就會話「明吖」嗰種。

A ︰有好多嘢大家心照啦！

記 ︰肝膽相照？

A ︰哈哈！勁岳飛時代咁！

E ︰或者可能用眼神，眼尾睄一睄呀、一個口形呀！

A ︰即係佢郁吓條眉都知佢想點咁！

冷戰考驗

記 ︰識咁耐有冇試過因一啲事而鬧交？

A ︰都唔係去到鬧交，只係冷戰。

E ︰係因為大家嗰時未有共識住，不過依家有喇！嗰次都係好小事，好朋友都會經歷呢啲，即係唔知道對方係咪真係當你係好朋友嗰啲位囉！好似男女朋友曖昧咁，未知對方係咪鍾意自己一樣！

A ︰其實好快就冇嘢，我哋當時冇嗌交，只係冷戰咗一日之後就好番，不過唔嗌交仲驚啦！

記 ︰相處之道係互相遷就？

A ︰我哋係冇乜所謂嘅人。

E ︰其實我自己係比較任性嘅，好多時都Feel到Anjaylia就得我好犀利、好緊要。

A ︰唔會吖！我平時都會好固執喎！

E ︰有啲位我會好任性，而佢會好固執囉！

A ︰跟住大家就會話是但啦！咁是但啦！

互訴心事

記 ︰Evelyn工作上或者感情上遇到挫折、唔開心，第一個係咪同Anjaylia講？

E ︰好多時唔會講，因為好清楚對方，例如Anjaylia有唔開心，都會等件事過咗先會講，加上佢可能見到我心情唔係咁好。

A ︰大家會有個位。

E ︰知道大家邊個時候應該講，邊個時候唔應該講，我唔開心都有搵佢，大家知點樣去安慰對方。

A ︰我哋會知道點樣對對方係最好，有時知道要退一步畀空間佢，有時就會主動啲。

記 ︰Evelyn之前感情上唔開心都有同Anjaylia講？

E ︰有同佢講呀！

A ︰女仔、男仔嘅事我哋都會講，但佢鍾意得嘅人，就算講咩佢都唔會理。

E ︰一般女仔做嘅事我哋都會做，行街、（目及）仔都會。

記 ︰有冇試過好唔開心？

A ︰佢成日喺電話度喊，佢好容易喊。

E ︰自己有時好執着，會逼自己埋牆角，佢係一盞明燈，將最真實嘅一面講畀我聽。

A ︰我會安慰咗佢先，咁之後會有嗰句講嗰句。

談情說愛

記 ︰有冇試過同時鍾意同一個男仔？

A ︰唔會！

E ︰佢鍾意啲嘢我都唔鍾意嘅。

A ︰所以我哋永遠食嘢都唔會爭食。

記 ︰想搵個點樣嘅男朋友？

E ︰要孝順、最緊要錫我又要志趣相投，咁先多話題。

A ︰我覺得對方要有愛心同對屋企人好。

記 ︰係咪一定要靚仔？介唔介意年紀相距好大？

E ︰靚仔都係其次。

A ︰（笑）係咪o架？個個女仔都鍾意靚仔啦！不過都係性格行先，就算係靚仔，但大家性格唔啱，一齊都會成日鬧交！

E ︰所以最重要都係對我好同專一，年紀唔係問題，我接受到同我年紀相距大嘅男仔。

記 ︰想唔想結婚？有自己嘅家庭生小朋友？

E ︰梗係想啦！如果緣分到，覺得對方可以付託終生嘅話，有閃婚嘅可能，而且我都鍾意小朋友嘅。

A ︰都係嗰句，緣分等個天安排，自己又唔係好急，搵到個好男仔先會結婚。

記 ︰點睇感情上出現多角關係？

A ︰（搶）自己接受唔到，唔會容許呢啲事發生，我依家梗係未試過啦！

後記︰砌Lego

在圈中情同姊妹的人買少見少，Anjaylia與Eveyln卻是其中兩人︰「我哋性格好Flexible（彈性），有時我衝，Anjaylia會退，相反佢衝，我都會讓，大家互補。」兩人以Lego作比喻，Evelyn說︰「我哋幾似Lego，性格唔同，但可以拼埋一齊，亦可以分手。」這份純真友情，令人羨慕！