新蜘蛛女戲接戲Emma Stone流年直上

新蜘蛛女Emma Stone火速上位，孭飛作《寫出友共鳴》在美國開畫票房冠軍，搞笑喜劇《滾搞了愛情》及《蜘蛛俠：驚世現身》亦陸續上映，人氣不容忽視！

對Emma來說，今年必定是豐收的一年，但她仍然謙虛地說：「我覺得唔係真係咁多人留意我，好多事直到發生之前，你都唔能夠太肯定！好似我13歲嘅時候，希望房間會有一部自己嘅電話，可以同朋友日傾夜傾，點知到我真係擁有電話時，佢竟然冇響過囉！人生往往就係令人咁尷尬！」

Emma有幸參與《蜘》片演出，問到是否引來朋友羨慕？她笑說：「我啲朋友只會問我想去邊度食飯，不過從來冇坐低講套戲，可能因為我唔係蜘蛛俠，安德魯加菲先會令人羨慕啦！」

墮水着陷阱

另外，Emma早前身穿比堅尼登上雜誌《VANITY FAIR》8月號封面，令人眼前一亮，不過她說：「嗰次係一個陷阱，佢哋話喺聖巴特島，所以要着比堅尼，所以我只好答應啦！拍攝當日，其實我腸胃唔係好舒服，而且仲不斷嘔！所以當我睇到封面後，我只係諗起兩件事：一係腸胃炎，二係嗰位出色嘅攝影師！」雖然她頗為謙遜，但新片票房高開，相信今年她會在影壇大放異彩！