司徒法正硬闖猛鬼醫院

自小對玄學很有興趣的司徒法正,原本是生意人,但1987年時,他經過澳門觀音堂時忽發靈感,在澳門開館幫人看相兼睇風水,自此踏足玄學界。他先後替有線及無綫收費台擔任靈異節目主持,曾走訪東南亞不少猛鬼地方,刺激經驗數之不盡!

多年前,司徒法正曾到泰國一間猛鬼醫院,令他畢生難忘:「間醫院有好多傳聞,其中一個話當時間醫院失火,燒死咗十幾個人,之後好多醫生、護士同病人都話撞過鬼!後來啲人就撤離咗,但因走得好急,連好貴重嘅儀器都冇人拎走,而且有傳聞話啲儀器三更半夜會郁,因為啲鬼魂就寄存喺嗰度……間醫院得一個看更,但又從來冇人偷嘢,個看更話有好多賊仔試過夜晚上去偷嘢,結果唔係跌落嚟就係跌斷手腳,一係就跑住落嚟話見到『有嘢』!」

輪椅掉頭「迎賓」

司徒法正抱住半信半疑的心情探秘,他說:「我行第一入間醫院,上到去我覺得陰風陣陣,去到2樓,我哋發現有一張輪椅喺樓梯轉角處,好似想阻止我哋上去咁!我一睇就覺得張輪椅有問題,於是我同大家講千祈唔好掂張輪椅,但阿Ben(工作人員)一腳將張輪椅踢咗去走廊尾!跟住我哋上樓,突然間走廊尾嘅玻璃窗全部爆開晒,我知我哋已經觸怒咗靈體!我哋經過2樓時,張輪椅唔知咩時候去番樓梯轉角,仲要向正我哋落樓梯嘅方向,好似『迎接』我哋咁!我見到咁即刻燒香唸咒,請靈體讓路,仲將張輪椅推番去原本嘅位置。我仲喺旁邊執起一個汽水樽,插炷香放喺張輪椅度,我話我哋只係路過,然後我哋就準備離開……」

「汽水樽向前飛」

說時遲那時快,攝影師驚惶地望住司徒法正:「我擰轉頭,發現插喺汽水樽嗰炷香彈咗出嚟,個汽水樽就向前飛兼跌爛咗,嗰張原本向住窗嘅輪椅就好慢咁掉緊頭向住我哋,當時我真係好驚,即刻走夾唔抖,嗰個情景我冇辦法忘記!」連司徒法正都話難忘,相信那時那景相當「堅」!

司徒法正曾到訪猛鬼醫院,嚇到9秒9速閃。

「猛鬼醫院」經已荒廢多年,現場人影都冇,相當陰森。