梁嘉琪台灣靈距離接觸

電視藝員梁嘉琪雖然有多年擔任靈異節目主持的經驗，但私底下卻膽小如鼠，即使只是看恐怖片，也可以嚇到數日數夜睡不着，經常感到鬼影幢幢。早年她到台灣拍攝靈異節目，事後才於電視目擊當時疑似撞邪實況，令她嚇破膽！

向來勁細膽的梁嘉琪，自爆多年來只看過一齣恐怖片，但已令她嚇到癲：「我只係睇過一套恐怖片，就係《午夜凶鈴》，隻鬼咪由電視機爬出嚟嘅……我睇完之後唔單止驚到瞓唔着，就連電視都唔敢開！因為我成日驚開咗電視之後，隻鬼會喺嗰度爬出嚟！自此之後，我冇再睇過恐怖片！」不過天意弄人，她竟被看中主持靈異節目，她直言過往出外拍攝節目時，曾遇過不少怪異事件，每次遇到均是嚇至失控大哭……

聞到屍臭味

雖然事發已久，但嘉琪仍猶有餘悸，她說：「呢件事發生喺台灣桃園某個廢置咗嘅娛樂場所，嗰度有4層樓高，20年前因為一場大火災死咗好多人，之後就一直有好多鬧鬼嘅傳聞！聽聞每次只要有人動土，就會發生意外或者詭異事件，所以咁多年都冇重建！嗰一次，係我第一次出外景拍靈異嘢，喺毫無心理準備下，我首先見到一間好殘舊嘅大廈，之後就有好多神主牌映入眼簾，再之後我聞到好大陣死老鼠味，同事話屍臭就係咁嘅味，搞到我好驚！不過為咗做嘢，我惟有硬住頭皮走入幢大廈……」

迷離狗吠聲

嘉琪表示該大廈殘舊到連一個正常門口都找不到，要撬開木板在隙縫中捐入去：「入咗去之後，我發現入面真係好黑，只能靠電筒照明！之後，我哋不停聽到唔知從何而來嘅狗吠聲，由於有人話狗見到『污糟嘢』會吠，當時我更驚！喺又嘈又伸手不見五指嘅情況下，我感覺到自己對腳不停踩落一啲搖吓搖吓嘅木板度，由於唔知自己踩到嘅實質係咩，當時我覺得我嘅神經已經繃緊到絕頂！」

半透明男仔

攝影隊原本目標是4樓，因為該層死了最多人：「我只係行咗去1樓，已經覺得好唔舒服，司徒法正師傅都Feel到『有嘢』，佢就叫我走先，而佢就同另一個攝影師再上，點知突然師傅都覺得好唔妥，佢即刻趕我哋出去，幫我靜心！嗰一晚，我驚到連飯都食唔落，雖然嗰刻我哋乜都冇見到，剪片時亦唔覺得有異樣，但條片出街之後，有家庭觀眾打嚟話某格嘅畫面有個細路鬼影，我哋即刻逐格翻睇條片，果然發現喺1樓轉角位嘅窗口度有個大概6、7歲、着住短衫短褲、呈半透明感嘅男仔冇乜表情咁望住我哋！我驚到毛管戙同狂喊，因為我發現自己當時同個靈體原來咁近，我到依家都覺得好心寒，唯一慶幸係我哋冇做過啲咩冒犯佢嘅事！」