古仔唔預「老婆」

型男古天樂被屈「秘婚」，他前晚出席萬聖節活動時仍風騷搞Gag，除了唱衰「老婆」外，又預告萬聖節將參與麻甩Party，實行「戒女」闢謠！

昨日驚爆「秘婚」的古天樂（古仔），前晚與索女陳嘉桓（Rose）出席《2011迪士尼黑色世界》。撐着拐杖的古仔透露，最近多了宣傳工作，問到酬勞能否「抵銷」醫藥費？他笑說：「呢啲有保險o架嘛！」

陳嘉桓扮米妮

談到萬聖節，古仔表示早已打算與舊同學扮嘢開Party，奈何每年都因工作而告吹，今年方能如願以償：「同學建議過我扮蜘蛛俠。（今年扮咩？）唔話你知，總之一定由頭包到腳，保證你哋認唔到！」並隨即唱衰「老婆」：「同學話千祈唔好帶老婆去，因為啲女人一驚就會搣你，隻手實瘀晒！」而穿上四吋高踭鞋扮「米妮」的Rose，笑指要找師兄杜宇航陪玩鬼屋：「我驚錯手打親人。」古仔即笑說：「嘩！佢哋兩個打低廿個喎！」

活動後，化身「Blackman」的古仔於十時四十五分現身機場，繼續依賴「第三隻腳」的他，拒絕再回應婚訊，問到婚訊是否由狂迷「幻想」出來，他只「唉」了一聲便匆匆入閘。