馬賽用三年證冇變質

去年跟吳卓羲傳緋聞,令馬賽的家人擔心乖女變質,故對她在娛樂圈工作有微言,但她懇求家人給予三年時間奮鬥,亦要力證自己依然是昔日的乖乖女。

在無綫劇《九江十二坊》飾演刁蠻小姐的馬賽,在劇中跟敖嘉年地位懸殊卻愛得義無反顧,她表示現實中未試過那種轟烈的愛情:「個角色係唔理爸爸反對都要同敖嘉年一齊,現實中最曳都係讀書時瞞住屋企人拍拖,發吓豆芽夢。」

馬賽透露,去年跟吳卓羲傳緋聞令她飽受壓力:「我哋只係普通朋友,但報道竟然可以無中生有寫到咁,嗰排壓力好大,爹哋媽咪都會畀親友問啲緋聞係咪真,搞到屋企人都有壓力!佢哋當時覺得娛樂圈係大染缸,問我係咪真係咁想做娛樂圈。我叫佢哋畀三年時間我,除咗要做出成績,仲要證明我喺娛樂圈都可以做一個樸實嘅藝人,同以前一樣咁踏實!」

難忘林保怡教睇戲

現年24歲的馬賽笑言心理年齡比同齡朋友成熟:「我覺得自己成長得好快,心理年齡應該係三十歲!」她表示難忘跟「視帝」林保怡合作,起初心情戰戰兢兢,但保怡相當友善,不時主動指點她:「佢好主動同我傾偈,問我鍾意睇咩戲,教我睇啲好戲唔係睇一次,而係要反覆睇十次,先可以學到人哋嘅演技!我有跟住做,不過暫時最多一套戲只係睇過四次,哈哈!」

服裝、場地:Love Girls Market

髮型:Sidney@HAiR

影視組

乖乖女馬賽希望用三年時間在娛圈奮鬥兼力證沒變質。

馬賽自言娛樂圈令她加速成長,故比同齡朋友成熟。

馬賽在劇中跟敖嘉年愛得轟烈,現實中卻未試過。(資料圖片)

去年與吳卓羲傳緋聞,令馬賽及家人大受困擾。(資料圖片)