軒仔惡補唱功省靚招牌

出道多年的張敬軒將跟港樂合作開騷，因過往跟港樂合作過的歌手都是超級唱家班，難怪軒仔不敢懈怠，專誠找老師學唱歌務求精益求精，省靚自家招牌。

軒仔將於11月跟港樂合作假StarHall開騷，因向來聽港樂的觀眾要求高，在樂壇出名唱得的軒仔，坦言今次有點淆底，要四出訪尋歌唱名師惡補聲學，他說：「有個女老師喺圈中好出名，好多歌手都跟過佢學唱歌，連容祖兒都係佢學生，之前我喺某個場合見過佢，一直好想跟佢學，今次趁呢個機會好好學習吓。」

貴飛降價賣$480

軒仔十分重視今次演出，除惡補唱功外，在戰衣上亦落重本：「搵咗陳華國幫手做衫，喺世界各地訂咗好多水晶，每套衫要成10萬。」他希望集潮流和傳統於一身，給予觀眾新鮮感，不諱言曾想過着裙：「今年男裝幾興將女裝元素擺入去，今次演唱會有 Part幾迷幻，可以着潮啲。」問到會否剃腳毛着短裙？他哈哈笑說：「短裙啱女仔着，歌衫以密實為主，唔會赤裸上身，等我操吓先。」

軒仔上次在紅館舉行演唱會，貴飛票價高達$680，但今次的港樂騷，最貴只是$480，他說：「之前睇過學友哥嘅騷，佢咁大製作都係$680，自己唔敢賣得咁貴。」軒仔為了今次演出花盡心思，還親自寫了歌曲《Stop The Time》配合，務求做到盡善盡美。