草蜢撈過界恨執導古裝片

入行26年的殿堂級跳舞組合草蜢，在紅館開演唱會時「妖氣沖天」，蔡一傑更忘我半裸晒「神鵰」，令他們在香港樂壇中長期佔據跳舞組合第一席位。但他們仍未心足，想拍電影、做導演，更聲言要拍古裝片！

草蜢近期的紅館演唱會大受歡迎，蔡一傑（傑仔）更受張國榮（哥哥）啟發，High爆半裸騷肌，激凸短打被稱為「大鵰、神鵰」，風頭盡出！三子跳舞跳到「出晒位」，但他們透露有更遠大的理想。蔡一智（阿智）笑說：「我第一鍾意音樂，第二鍾意電影。（想拍戲？）好恨！想拍一套由草蜢諗出嚟、有草蜢角度嘅電影！」傑仔立即搶答要拍笑片，因為他們平日出騷有很多笑料：「好似有次登台，我哋跳到最後一首歌，我因為套衫好逼爆，全身肌肉都好緊，最後一下逼爆咗褲襠，哈哈！（有冇走光？）冇，好在冇人見到！」

性感戲搵女星代拍

熱愛電影的阿智想了一會說：「我想拍古裝！一來好搞笑，二來又新鮮。我其實可以做埋導演，因為之前有好多MV都係我拍，電影只係再拍長少少。（演性感戲得唔得？）我哋冇嘢畀人睇啦！依家啲人鍾意睇事業線，都係畀女星做啦！」

提到公餘有甚麼想做？他們說：「做慈善啦！我哋最近幫公立醫院做大使，下月9號有個步行活動，希望籌到善款可以買多啲新設施。」三子自爆都是政府醫院出世，覺得政府醫院對一般市民大眾很重要，雖然阿智、蘇志威（阿細）的女兒都在私家醫院出世，但他們認為私家醫院也有好處，因可分擔政府醫院的壓力。