袁詠儀做壞蛋體罰降「魔」

為人父母者，必然想望子成龍，但袁詠儀只想張慕童做個快樂人，不惜擔演兒子眼中的「反派」角色，有時還會加以適當體罰，希望他將來成為一個有量度的男人。

口述：袁詠儀　筆錄：影視組

我對魔童嘅期望唔算大，只係想佢做個快樂人，最好就係做老闆，輕輕鬆鬆冇壓力啦！不過，有時又想佢做醫生、律師，就會畀老公話我：又話想佢做個快樂人？其實都唔輪到我去決定。

講到教仔心得，教男仔，心要狠，因為佢將來要孭起照顧老婆、養家嘅責任，所以佢好細個時，醫生話唔好抱我就唔抱，到6、7個月大，佢識坐喺BB椅食嘢，我就將啲飯粒擺喺枱面，等佢用手指執嚟食，要訓練佢獨立，男仔要面對社會、面對人，辛苦過女仔㗎！仲有，男仔最緊要有量度，要教佢唔好咁易發脾氣，又教佢唔好揀嘢食，咩都揀，邊會有人鍾意同你一齊食啫！我會參考人哋嘅教仔方法，好嘅學，唔好嘅就切忌。

當然，細路仔教一、兩次未必聽話，要狠心亦要長氣，佢哋先至入耳！所以，我喺魔童眼中係反派，唔係好人，有時為咗俘虜佢個心，就會同佢做朋友，兩個人去行街睇戲，乖嘅時候有獎勵，呢段時間會畀適當嘅自由佢，但我始終覺得佢唔能夠冇人驚，所以會有適當嘅體罰，係我自己揀呢個角色嘅，亦都做得開心。

重視教育環境

我同老公喺教仔呢方面都有共識，唔會喺物質上滿足佢，唔係所有嘢都畀最好嘅佢，玩具有時可能只係普通嘅膠車，我哋都認為喺能力範圍下畀最好嘅讀書環境係最重要。不過，老公曾經唔認同我某啲方法，例如魔童5個月時，我就帶佢去上普通話班，聽老師講故事，畀老公鬧我黐線！

啲人成日問我幾時追個女，哈哈……呢個係我一廂情願，我仲未打動到老公芳心，順其自然啦！（全文完）