袁詠儀「踩屎」多學收斂

漫長人生,少不免做錯事,但論到人生污點,袁詠儀(靚靚)坦承經常口不擇言!雖自覺性格從沒變過,但「踩屎」多了被迫成熟,為自己為兒子,她甘願改變!

講到人生污點,梗係包括我成日鬧人啦!我由細到大都任性,想做就去做,直到依家都係,不過依家唔再「嘭嘭聲」咁衝去做,會睇吓對個仔影響有幾大,我唔想做咗嘅嘢會影響到佢!由電視轉戰電影,之後又係一帆風順,一定會飄飄然啦!咪更加亂講嘢囉!以為啲人會包容你,但事實唔係,攞咗影后第一年就醒,因為發覺唔係所有人都鍾意你,有人會攻擊到你死為止!

「係咁大步喎」

其實我冇乜變過,可能佢哋覺得我做咗影后唔再係細路女,唔應該講呢啲說話,嗰段時間四方八面都覺得我態度好囂張,連行步路都大步啲!我心諗,我天生腳長冇辦法,係咁大步喎!依家都係咁!嗰刻諗,點解以前做嘅嘢你哋覺好得意,依家做就覺得討厭呢?呢樣嘢令我到依家都有避忌,喺唔熟嘅人面前唔多講嘢,其實我性格係冇變,亦唔鍾意咁樣,但冇辦法!

「唔覺乞人憎」

不過老實講,我當時唔覺得自己乞人憎喎!有啲身體語言我係冇意識,不嬲係咁,係人哋睇我身份唔同咗,我仲以為個個都玩得,原來有啲唔鍾意同你玩,唔識死去撩人咪「踩屎」囉!踩得多咪知囉!第二年已經冇咁囂啦!第二年攞影后,有記者問我聽唔聽到噓聲?我話聽唔到,咁真係聽唔到嘛!之後我諗記者講呢番說話,係想我唔開心定想我檢討呢?好深思熟慮佢呢番話,佢咁做係因部戲定係我個人有問題?我諗係因為我個人嘅問題,開始留意到撞板太多,食咗唔少死貓,就要收斂!(明日待續)

影視組

入行多年的袁詠儀,已從當年入世未深的小女孩,慢慢變成世故的影后。