栢芝撲返港三母子團圓

每逢佳節倍思親，雖然謝霆鋒與張栢芝不能再走下去，但一對寶貝仔依然可以活得幸福快樂！為了讓囝囝溫馨過節，栢芝忙爆仍抽空帶Lucas到泰國主題公園玩到癲，再於72小時內趕返港與細仔Quintus慶祝，三母子小團圓！

中秋佳節首重團圓，可惜謝霆鋒與張栢芝敵不過5年之癢，踏上離婚之路，各自度過離婚後第一個孤獨中秋！雖然不能再一家人齊齊整整，但Lucas與Quintus依然是鋒芝的心肝椗，無奈霆鋒正在內地趕拍劇集，被拒請假返港陪仔，氹小朋友的責任惟有落在栢芝身上。

4歲的Lucas早前開學，忙得不可開交的栢芝堅持湊他返學，務求盡好媽咪的責任。據知，為免兩個寶貝仔大時大節冇人理，栢芝早已諗定連串活動，希望他們盡快擺脫父母離婚的陰影，過一個快樂中秋。早前有傳栢芝帶愛兒到外地主題公園玩，但據知因Quintus年紀太輕，不宜玩刺激機動遊戲，故栢芝一度打消外遊念頭。但由於早已答應Lucas，她最終忍痛暫時拋下細仔，於本月9日帶Lucas到泰國一個主題公園喪玩。不過，為趕返港與Quintus「小團圓」，栢芝此行貴精不貴多，重點出擊Lucas想玩的玩意，然後於前晚迎月夜急急返港陪細仔，完成72小時遊泰之旅。

三電影招手

一心兼顧家庭與事業的栢芝，據知如今至少有3套電影向她招手，除明年3月接拍與甄子丹合作的電影《夫妻殺手》外，還有一部韓國片及一部與權相佑再度合作的電影尚未落實，而栢芝方面據知對其中一個劇本十分欣賞。

記者昨日致電霆鋒父親謝賢，問到有否陪孫仔過節，他說：「係你哋寫佢哋喺泰國嘛！唔講喇！拜拜！」而栢芝透過經理人Emily微博祝粉絲中秋節快樂，加上新歌《曾經》好評如潮，看來她心情不俗。