袁詠儀第三者心聲：快樂蓋過一切！

兩屆金像獎影后袁詠儀，由當選港姐冠軍到現在的幸福家庭，可謂一帆風順，不過是非也像「套餐」般一併而來！由天才演員變成被富商照顧的女星，再進身影后到賢妻良母，高低起伏，戲如人生！

其實我都唔係一帆風順o架！哈哈……讀書對我嚟講由細到大都係挫折喎！雖然唔算係好差，但唔會上心囉！係冇興趣讀書，只係掛住玩，打天才波，測驗、考試至臨急抱佛腳，但又唔使死，實升到班，總之頭就一定冇我份，尾亦冇我份，永遠係中間，所以我依家成日都叫人畀心機讀書o架！自己都好後悔。不過，嗰時唔覺得係挫折，因為我係屋企嘅小霸王，爸爸同阿公最錫我，屋企有人妒忌我、憎我o架！好似我阿婆，見親我就喊打，成日話我老竇黐線、變態，吼老竇唔喺度就打我，嗰陣時做任何事都唔使向任何人交代，都算幾任性，所以童年過得好愉快。

後悔傷害人

選完港姐，事業起步得好好，好快做主角，前景唔錯，好多人會奇怪點解嗰時我咁都會接受富商照顧，仲要做第三者，其實嗰陣我唔會覺得嗰一段感情有乜問題，只係人哋嚟追你，你去接受，我唔會將嗰段感情當係乜嘢，段感情係愉快嘅，好似我生日佢送花氹我，嗰一刻唔覺係被照顧，只覺得係有感情，只係佢經濟能力好好，令我可以好開心，當時係做咗第三者，但嗰時嘅快樂係可以蓋過一切，當然隨住年紀大咗，人成熟咗，就知道係傷害咗人。

你問我有冇後悔接受照顧，後悔係一定會有！其實幾年後分開咗，夜闌人靜時諗番，自己的而且確係傷害過人，有冇傷害自己呢？我又唔覺得傷害自己喎！因為係自己揀，又開心過，但係某程度上係傷害咗人，好在及時回頭，至於係咪好錯嘅一件事呢？一定有錯嘅，真係好彩及時回頭！冇傷得好深，對所有人嘅破壞性都未去到最壞。

唔想呃個仔

07年接受陳志雲訪問時承認呢件事，有人問我點解要認，其實可以唔認！認！因為我真心覺得嗰段係愉快嘅感情，係開心嘅回憶，只係礙於我哋嘅身份、背景，大家覺得有問題，點解唔可以認呢？我真係有做過呢樣嘢嘛！一來我個人係守唔到秘密，二來我做媽咪後唔想若干年後，個仔嚟問我而我呃佢，我諗得好遠，會有人同佢講你媽咪係咪咁，佢可能返嚟問「阿媽你以前係咪咁」，睇吓你用咩角度解釋，反而你呃佢，佢會記得，以後當你講真嘢時，佢都覺得你呃佢，唔想個仔大咗好難面對。每個人都有過去，只要未做到最錯嘅時候識得回頭，即係仲有機會。

Profile

姓　　名：袁詠儀（Anita Yuen）

出生日期 ：1971年9月4日

身　　高 ：五呎六吋

家庭狀況 ：

01年與張智霖在澳洲結婚，06年誕下兒子張慕童（Morton），乳名「魔童」。

演藝成就 ：

90年香港小姐冠軍兼最上鏡小姐

91年國際華裔小姐亞軍

93年香港電影金像獎最佳新演員

94年香港電影金像獎最佳女主角

94年第一屆中國珠海海峽兩岸最佳女主角獎

94年香港國際電影節最佳女主角

95年香港電影金像獎最佳女主角