詩雅炮製有營麵包

「叉燒包、漢堡包，樣樣亦吃得飽。」雖然歌仔係咁唱，但在這個注重健康及體重的年代，麵包除了要吃得飽外，最緊要是好味兼有「營」有款。以麵包狂自居的詩雅，這天自動請纓到麵包店炮製現時OL及家長熱捧的無牛油養生歐克麵包，親身體驗健康麵包的「味」力。

望到麵包工場內琳琅滿目的麵包，詩雅即高興得說不出話來，更拿着師傅事先準備好的麵糰搓個不停。曾試過用麵包機自製麵包的詩雅，整個製作過程尚算有板有眼，只是搓麵粉需時較長，搓起的麵粉糰看上去亦不及師傅的好看；雖然如此，她依然自得其樂：「呢個係第一個自己真正落手落腳搓嘅麵包，好好玩，估唔到依家做麵包可以做到好似工藝品咁，仲有Layer添，真係好新鮮。多謝師傅頭先全程傍住我，教我控制分量，否則我覺得自己唔會成功。」

盼開蛋糕店

雅興大發的詩雅更笑言有意開精品蛋糕店一嘗當老闆娘的滋味，談到最愛麵包頭三甲，她笑指是牛角包、提子丹麥酥及法國麵包：「媽咪喺我細個嗰陣，成日買丹麥酥畀我食，可能童年回憶啦！我依家都仲好鍾意嗰種味道。牛角包我鍾意佢夠鬆脆又好香牛油味，法國麵包我就鍾意佢咬落去好煙韌，但入面又軟綿綿，口感好特別。」　　

雜糧小太陽$15（a）

「呢個個樣真係好靚，成個太陽咁。雖然麵包面鋪滿忌廉曲奇餅碎，感覺好似好肥咁，但其實成個包都係由五穀麵粉做，而且少糖少油；即使啲材料聽落好Dry，但食落依然滿口奶香，我覺得小朋友一定鍾意食嘅。」

養生歐克 $13（a）

「我聽店主講，呢個養生歐克日賣二百個，除咗街客，每日仲有好多嚟自學校嘅定單，仲有啲媽咪會坐車嚟幾打幾打咁入貨。呢個麵包雖然細個，但裏面有齊杞子、夏威夷果仁、瓜子仁、提子同黑芝麻，而且佢仲用咗兩隻唔同嘅麵粉整成，其中一隻加咗粟米汁，所以即使冇加到牛油食落口都好香。」

地瓜酥$8（a）　　

「我本身鍾意食Tiramisu，呢個酥望落去好似Tiramisu，加上我又鍾意食地瓜，所以揀咗嚟試。呢個酥嘅口感既鬆軟又幼滑，中間嘅忌廉芝士餡又酸酸甜甜咁，好開胃，呢個酥中西合璧，而且一啲都唔漏。」

榛子皇冠$18（b）

「由外國訂製的麵包模倒模成皇冠形狀，內裏除了有又香又濃的榛子蓉外，更有一層層薄如紗的酥皮麵包，味道偏甜而不漏。」

紅腰豆忌廉芝士法包$17（b）　

「法國麵包吃得多，但呢個很特別，雖然佢唔似一般法國麵包鬆脆，但就多咗一份煙韌！忌廉芝士配煮得又軟又腍嘅紅腰豆，口感同味道都相當配合，係值得一讚嘅創新嘗試。」

雙重布朗尼 $6.5（b）

「喺朱古力蛋糕內加入黑朱古力粒，還有香甜嘅酒浸提子及杧果乾，無論口感及味道均相當豐富，對於朱古力迷嘅我，實在是好味之選。」