Miranda為仔犧牲天橋

澳洲名模Miranda Kerr除了在天橋上受萬人景仰，天橋下的她亦貴為萬人迷男星奧蘭度布林嬌妻，今年更榮升人母，美滿生活十足童話故事！

早於13歲入行的Miranda Kerr樣子甜美，臉上兩顆小酒窩更加是生招牌，身為Victoria's Secret內衣模特兒之一的她，身材固然弗到震！今年1月誕下兒子Flynn後，這位超模媽媽已極速收身，上圍甚至比產前有過之而無不及！但萬大事以愛兒為先的Miranda卻說：「我唔在乎可唔可以重拾產前身形，最緊要係Flynn健康！」她還笑言懷孕時吃個不停，即使體重急升40磅仍處之泰然，卻遭祖母勒令節食：「佢怕BB吸收得太多，唔知點生佢出嚟！」結果不出所料，Flynn出生時重達10磅！

家庭與事業魚與熊掌，榮升人母的Miranda坦言，不會全職回歸模特兒行列：「對我嚟講，首要任務係做個賢妻良母，工作只係其次囉！」儘管如此，崇尚天然的她還是染指健康產品生意，開發自家品牌KORA Organics專賣有機護膚品，更不時在網誌與用家交流心得，出心又出力。

望子腳踏實地

提到兒子Flynn的將來，Miranda不諱言希望他跟自己兒時一樣在澳洲鄉郊成長：「嗰度啲人腳踏實地，唔會裝模作樣，唔會在意人哋着乜，只會做番自己！」她與老公奧蘭度湊仔不愛假手於人，盡量不請保母，她還不禁大讚老公湊仔有一手：「佢同囝囝相處得好好，湊仔又快上手，絕對應付有餘！」幸福滿瀉的她更自豪地說：「生仔係我人生中最美好嘅經歷！」