高妹莊思敏難忘被嘲矮

模界打滾十年的莊思敏，經歷不少「甜酸苦辣」，由零收入至月入六位數、被批評太矮到獲邀赴日發展，劇情峰迴路轉。

今年係我入行第十個年頭，諗番呢十年嚟，模特兒界嘅變化好大。當年入行前要上堂學Catwalk，學習點樣擺甫士等，仲要去學化妝，但依家嘅模特兒未受過任何訓練，都會自稱係模特兒！

模特兒表面風光，唔少人爭住入行，但當然有鮮為人知嘅一面。呢行最大問題係收入唔穩定，我試過整個月係零收入，但有時「旺場」嘅話可以一個月有十多萬收入，所以要識得「好天收埋落雨柴」！模界以前有個不成文規定，每個工作都有公價，唔會「Below Pay」，但依家有啲規模較小嘅模特兒公司為求生意，幾多錢一個工作都肯接，無形中拉低模特兒嘅身價。

唔好以為模特兒高高在上，做錯事當然亦會捱鬧，有時冇做錯但會畀人無理取鬧！客戶鍾唔鍾意你係佢主觀決定，而且人有情緒嘅，如果心情唔好時難免會發洩喺你身上，記得試過畀客人話我矮，仲淨係話我一個！不過，我嗰陣冇理佢，亦未試過因為捱鬧而罷工。入行以嚟，我未試過答應出騷後而臨時失場，可能我好好彩，未試過傾掂後畀客戶提出過分要求，只係試過工作時間比原先嘅長，但我一定會爭取自己嘅權益，唔會忍氣吞聲。

被迫放棄攻日

依家唔少模特兒鍾意去日本發展，唔講唔知，我都算係首批被日本公司睇中嘅模特兒之一，但最後都放棄咗。我當然好想試吓，但家人勁反對，仲差啲要趕我出街，斷絕關係！因為當年大家對日本模特兒界唔認識，印象中只有AV女郎，所以我話留日半年工作嗰陣，家人即反對！（全文完）

後記：「笑」女心事

莊思敏向來敢作敢為亦敢言，其言行跟外表一樣給人爽快的感覺，當相約她做訪問，她二話不說便一口答應了。訪問期間，她總是有話直說，毫不忸怩。不過，最近跟吳浩康分手的她，說話時明顯少了一點爽朗笑聲，希望她能盡快走出分手陰霾。