陳奕迅拒搵代母：冇咗動機同過程

陳奕迅早前揚言想追多個BB，卻遭老婆公開以太忙為由，建議另找代母。陳奕迅昨日表示對「代母論」很有保留！

昨日陳奕迅（Eason）到海港城宣傳新片《全球熱戀》時，擔心代母溝淡了他與老婆的「貨」：「唔明點解要放嘢喺人哋度，咪變咗三個人嘅嘢？（抗拒代母？）等我研究咗先，我怕生出嚟個樣似代母咋！係嘅就搵個靚啲，好似揀家傭咁，但件事會唔會唔自然？用代母好似冇咗個動機同過程，唔係太好，香港人咁抑壓。（同老婆傾過？）有傾，我明佗仔辛苦，但天職喎！我見人大肚都好開心，我心情好矛盾，但我唔急，領養都OK。（擔心個女唔鍾意？）唔到佢揀同妒忌。」

Baby劉若英攜手谷戲

同場的郭富城展示購自英國的心形地球圖案Tee，他說：「同套戲好夾。（買情侶裝送畀熊黛林？）冇喎！嗰時喺男裝部，時間又短。（同佢慶中秋？）我要為長沙演唱會綵排，希望同媽咪、朋友有一個鐘賞月。（娶老婆照顧媽咪至算孝順？）咁問法，激死我！戀愛問題會低調。（請熊黛林睇戲？）唔請都會睇。（許鞍華新片《桃姐》有對白擺你同高瘦女模上枱？）唔介意，多謝晒，估唔到有人拍戲都咁掛住我。」此外，Eason、Angelababy及劉若英等在《全》片導演夏永康率領下，登上新一期時裝雜誌，以《寂寞星球上的愛》為題力谷新片，而同期封面女郎則是已成功殺入荷里活的Maggie Q。