莊思敏做梨渦小姐翻身

向來對電影演出有興趣的莊思敏，原來早於04年已闖電影圈，但不足一年便重投模界，在失意之下，成為許冠傑的Sam女郎，可謂柳暗花明。

如果大家有留意，應該知道我近年開始向電影界發展，其實今次係我第二度闖影圈，大家唔知道唔出奇，因為當時結果係四個字：無疾而終。

我第一次勇闖影壇係04年，當時我簽咗間電影公司，點知對方遇上官司畀人告，真係出師不利。當時我仲專登搵師傅改咗個藝名入影圈（幾認真），叫做莊嘉文，大家冇聽過都唔出奇，因為個名只係用咗一年，而且當時我冇工作，個名根本冇乜機會見報。我覺得個名真係好唔利我囉！最後都係用番原名。

大讚許冠傑好人

以為呢年會食穀種啦！但好在天無絕人之路，我好好彩有份參與歌神許冠傑（Sam）嘅巡迴演唱會，我當時仲有個『朵』o架！叫「梨渦小姐」，因為每逢阿Sam一唱《梨渦淺笑》呢首歌，我就會出場。阿Sam真係好好人，我記得聖誕以及做冬當日，阿Sam都會安排台前幕後一大班人一齊食飯，但係佢好搞鬼，聖誕節當日食中菜，做冬就反而食西餐，真係估佢唔到。

記得有次我哋一齊食飯，當時阿Sam戴住耳筒聽歌，期間大家講起某個話題，點知阿Sam突然搭訕，所有人都畀佢嚇親，因為當時大家都以為佢聽緊歌，聽唔到我哋講嘢，嗰時先發現原來佢個耳筒唔係聽歌，只係做掩飾，唔想畀人打擾，但遇到有興趣嘅話題，佢都係會搭訕。

言歸正傳，最後電影公司無條件放生咗我份約，我就繼續做模特兒，我嘅勇闖影圈第一擊就此匆匆告一段落。（明日待續）