栢芝寸王晶劇本唔掂

張栢芝與謝振軒（Lucas）母子檔演出電影《無價之寶》，該片投資方早前炮轟栢芝不肯做宣傳，惹來栢芝經理人在微博反擊兼澄清。前晚栢芝亮相該片香港首映，未知是否栢芝不甘被屈，全程寸爆電影編劇、劇本唔掂，導演王晶則見招拆招笑指待Lucas十八歲寫愛情片給他演出！

張栢芝與謝霆鋒協議離婚後，她前晚首度在港公開亮相，身穿Jean Paul Gaultier碎花Jumpsuit、一頭粟米爆炸新髮型出席電影《無價之寶》首映，狀態不俗。早前曾傳出栢芝收千萬元片酬拍攝此片，卻違約不肯出席宣傳活動。栢芝經理人即在微博反擊兼澄清，火藥味濃。前晚栢芝於台上全程寸爆，笑笑口地連環踩「編劇唔掂、劇本唔得」。

讚兒子有演戲天分

司儀問到栢芝和兒子Lucas拍戲時的趣事，栢芝坦言兒子只是像平時一樣，在港拍攝一天很舒服，完全不知自己在拍戲，當再問到Lucas有否流露出演戲天分，栢芝說：「佢有我嘅DNA，好鍾意改對白、爆肚，可能佢覺得編劇唔掂，成篇對白一句都唔跟，自己作，做到小孩子天真一面。（有冇叫住要再拍呀？）冇呀！可能啲劇本唔得啦！」身邊的王晶面不改容，笑笑口說：「等佢18歲拍部溝女片畀佢啦！」

拒受訪十分鐘即閃

栢芝前晚和曾傳緋聞的鄭中基密密傾，及至切月餅預祝中秋，有條狀餅碎突然「動L」，兩人相視而笑。由於不接受傳媒訪問，栢芝逗留十分鐘即離開。對於栢芝不肯宣傳傳聞，王晶說：「佢之前喺廣西做咗一次，開鏡又一次，但作為製作方梗係覺得愈多愈好啦！（栢芝配唔配合到宣傳？）我都拍咗幾百部戲，唔會強求啲朋友做啲唔想做嘅事。（會否再同佢合作？）睇成個走勢囉！暫時都冇適合。」而被栢芝指「劇本唔掂」的《無價之寶》，在內地八月十九日公映，有指票房未達理想，而投資該片的電影公司發言人則指電影暫沒有實際票房數字。