超雲火都嚟 肥啲≠有咗

賭王何鴻燊三房千金何超雲與無綫藝員陳山聰公開戀情後，有傳二人早前外遊時同房，更傳出心廣體胖的超雲有喜！三太陳婉珍昨日表示若事件屬實會幫手湊孫，還以「暫時OK」評山聰，不過超雲則發火說：「唔係肥啲就代表有咗囉！」

超雲自宣布與山聰拍拖後，不但成為全城熱話，更招惹不少傳言！三太陳婉珍昨日與組合草蜢出席《廣華『牆』青Goal Go高》慈善步行榮譽大使委任儀式時，首度開腔回應「雲山戀」。有傳「雲山」早前外遊期間同房，更有指超雲身形變得圓潤，惹來懷孕傳聞！問到若然超雲「搞出人命」，會否讓她生BB？三太說：「冇睇過報道，唔知點答！」之後她深呼吸說：「如果真係唔好彩，唔識得保護自己……我都會幫手湊！」

了解要以年計

談到對「未來女婿」山聰的印象，三太說：「接觸過冇問題，但了解要以年計，暫時OK！（首個印象呢？）覺得佢係高身形男仔，性格要了解過先知！（有指山聰入住陽明山莊？）我名下冇陽明山莊物業，嗰度我冇樓，唔應該信傳聞，娛樂版我唔係成日睇！」談到山聰經濟不及女方，她說：「睇佢哋信心，如果一個人有上進心，唔介意有錢定冇錢！」但她踢爆「雲山」經常吱吱噚噚：「我同何生（何鴻燊）講細路嘢，佢哋講乜我唔知！（何生催婚？）佢個個都有催！（介意山聰結過婚？）婚姻生活唔好，離婚唔係一個人嘅錯，相處可能有困難，夾硬一齊都冇用！」

問到山聰會否做何家女婿？三太即反應甚大說：「嘩！未諗咁遠！（山聰有冇送禮？）送冰皮月餅。（中秋一齊過節？）佢哋人月雙圓，不過中秋飯都預咗佢嚟！（超雲係咪視山聰為結婚對象？）超雲都話自己仲細，依家梗係鍾意，唔知以後！（你有冇信心？）唔係我畀佢，要睇佢哋自己！（叫佢哋安全啲？）如果一開始講呢啲，佢就唔會講嘢畀你知！自己要有接納嘅心，做父母提佢哋小心啲！」此外，有指三太公司旗下某型號的直升機在全球屢生意外，她說：「今日唔講呢啲嘢！」至於草蜢除邀請市民參加慈善步行活動外，還透露下半年將會繼續巡唱，問到是否賺大錢？他們說：「搵得來，使得去啦！」

同媽咪有默契

本報記者就三太的言論，昨日致電給超雲，她發火反擊：「香港有個別記者好冇道德操守、好冇尊嚴！問埋啲無謂兼尖酸刻薄嘅問題，我好唔開心、好唔鍾意！之前媽咪出席活動時，我收到記者短訊，話會問你媽咪嘢，我即刻打電話叫媽咪盡量唔答，唔好講私人嘢！」超雲表示已公開戀情，但與山聰如何拍拖及相處則涉及私隱，毋須向其他人解釋及交代，她強調：「下次我會同媽咪出席活動，有乜嘢可以問我，唔需要問媽咪，但我唔會多講私人嘢！（媽咪有冇叫你小心？）唔明白『小心』係乜嘢意思！我都拍過幾次拖，同媽咪有默契，知道自己應該點做！」

對於拍拖後被指心廣體胖，惹來懷孕傳言，超雲勞氣地說：「好奇怪點解肥啲就係有咗？點解瘦先好？肥啲唔可以靚咩？一定要瘦到骨劖劖先靚？唔係肥啲就代表有咗囉！（同山聰感情狀況？）相處好好，但好私隱問題就唔想再多講！」