霆鋒生日打機療情傷

前日踏入31歲的謝霆鋒,晚上跟家人及多位好友慶祝生日,在親情和友情的氛圍下,撫平了離婚的傷口。伍允龍、郭偉亮及劉浩龍等好兄弟更陪他講詠春兼打機,齊齊避開提起栢芝。

自鋒芝發聯合聲明宣布協議離婚後,霆鋒一直寄情工作,前日趁生日才放鬆一下。據知,劇組體諒霆鋒,讓他放假兩、三天跟家人及好友慶祝。前日,霆鋒返港後先往陽明山莊跟兒子Lucas及Quintus度過逾三小時,晚上則在金鐘寓所舉行生日會。

當晚出席霆鋒生日派對包括父親謝賢、妹妹謝婷婷及男友安志杰、好友伍允龍、郭偉亮及女友葉佩雯、劉浩龍等,但媽咪狄波拉因不在香港而缺席。據知,他們買了蛋糕及朱古力等美食,霆鋒則叫酒店到會,大班人邊食飯邊傾偈,幾個兄弟還陪霆鋒打機兼講詠春。席間,眾人避開提起栢芝,以免勾起霆鋒的傷心事。

未有借酒澆愁

據知情人士透露,當晚一班人只飲汽水,未有人飲酒,霆鋒亦不用借酒澆愁。由於他早前在吉隆坡拍戲,接着又北上拍劇,跟一班好友已有半年沒見,所以當晚大家邊玩邊傾勁開心,霆鋒亦重現歡顏,他還收到陳奕迅、李璨琛、梁漢文及張衞健等好友的電話祝福。另一好友孫祖楊早前曾探望Lucas及霆鋒,前日上載與兩父子各自的合照分享,順道祝賀好友生日快樂。

霆鋒放完假後,據知便會飛返北京拍攝內地劇集《下一個奇迹》,之後還會去上海及台灣等地拍外景,一直拍至十月底才完工。不過,霆鋒於下月底會返港出席一個代言活動,亦是他宣告離婚後首度在港公開見傳媒,相信屆時離婚手續亦已辦得七七八八。

音樂組

霆鋒返港先見囝囝,晚上才與親友開生日會慶祝。(資料圖片)

生日會上,好友避開提起栢芝,以免霆鋒觸景傷情。(資料圖片)