開學喇!

新學期又到！同時兼顧學業及工作的藝人「認真唔簡單」，經歷的辛酸事亦較同輩多。透過Q&A趣談，大可窺探各人面對開學的心態。升中七的顏卓靈仍保持考試第一，實屬難能可貴！陳若嵐將攻讀心理學學位；Fantasy成員Cammi及Suki則繼續享受中學時青葱歲月。

Q1：入行後校園生活有否轉變？

Q2：兼顧工作與學業會否感吃力？

Q3：曾否因分身影響學業？

Q4：屋企人體諒與否？

Q5：成績最好與最差科目。

Q6：讀書趣事一至兩則。

陳若嵐自我增值心理學

趙碩之師妹、o靚模陳若嵐年前推出首本寫真集後，即重返校園自我增值，早前更完成嶺南大學的副學士課程，並於今年以Part Time形式攻讀心理學學位，向大學之路進發！成熟的她沒有沉迷耀眼的幕前工作，反而更想轉職公關。

Profile

陳若嵐（Melody）

出生日期：1989年5月5日

年　　齡：22歲

身　　高：165cm

興　　趣：畫畫、跳舞、游泳

簡　　歷：09與尹蓁晞（Yumi）推出寫真，因在動漫節被摸Pat報警，登上A1頭條。最近減少演出專注大學課程，只客串為亞視擔任主持工作。

1：冇喎，其實都冇咩人認得我！仲有出咗寫真後比較貪靚，會化少少淡妝返學，望落去精神啲囉！不過，新同學個個都專注讀書，我就半工讀，所以難熟啲。

2：當然啦！試過因為做嘢走堂，同埋成日都唔夠瞓，所以我將啲堂集中喺某幾日，方便Day Off出去做嘢。

3：因為要自己畀學費，加上我唔想借政府Grant-loan，所以都做好多Part Time，唔多唔少都有啲影響。

4：都好體諒，媽咪由細到大都放手畀我自由發展。我仲會幫細佬妹準備開學用品同教佢哋讀書，所以媽咪好放心。

5：最差係數學，所以細佬妹問我都耍手擰頭，反而文科嗰啲會好啲。

6：好記得有個阿Sir第一次見面好惡，但之後因為我勁多嘢講，又主動答問題，佢愈嚟愈錫我，有次有科唔夠分，佢見我乖就加夠平時分畀我，哈哈！

顏卓靈金榜題名不言棄

有「齙牙薛凱琪」之稱的女新人顏卓靈即將升讀中七，除了經常拍攝廣告外，今年更有份拍電影《百年浮城》及《大追捕》，與影帝郭富城及任達華合作，難得的是其成績仍能名列前茅，上學期有多個科目全級考第一，她直言目標是升上大學，絕不為工作放棄學業。

顏卓靈（Cherry）

出生日期：1993年12月27日

年　　齡：17歲

身　　高：165cm

興　　趣：跳舞、唱歌、劍擊、演戲

簡　　歷：曾拍攝Olympus相機及海洋公園等廣告，參演電影《百年浮城》及《大追捕》，甜笑時露出齙牙及冬菇頭是其標誌。

1：生活分別唔大，都有人話我似薛凱琪，知我拍廣告都唔驚訝，多咗工作，同朋友距離感大咗！

2：最忙係中四時參加森美小儀歌劇團，連續幾個月放學後都要排戲，食嘢都冇時間，又經常排到半夜，長期唔夠瞓。

3：都有啲，不過自己底線係考試測驗前係唔會接工作。

4：父母冇反對我入行，放手畀我獨立處理，但如果我夜返，媽咪會坐喺廳等我返屋企，好關心我。

5：英文比較好，會考都有A，呢個學期好慶幸英文、電腦同體育都考第一，最差係化學科。

6：最近參加劍擊比賽，個個都好緊張投入，每得一分就大叫，我就唔會，人哋提我仲扭屁股嗌好嘢，好似係去搞笑咁。

CammiSuki回歸校園買文具

o靚模組合Fantasy成員Cammi及Suki分別將升讀中四及中六，學業日漸忙碌，今年她們與師姐齊齊出寫真，反應甚佳。但經過五光十色的暑假後，也要回歸校園，這日她們結伴購買新文具及校服，迎接新學期！

Profile

謝芷蕙（Cammi）

出生日期：1995年3月18日

年　　齡：16歲

身　　高：171cm

興　　趣：唱歌、看書、扮靚

簡　　歷：o靚模組合Fantasy成員，今年與師姐冬甩推出10人寫真。

劉玉卿（Suki）

出生日期：1994年8月12日

年　　齡：17歲

身　　高：170cm

興　　趣：唱歌、跳舞、看電影

簡　　歷：o靚模組合Fantasy成員，今年與師姐冬甩推出10人寫真。

S1：老師更加關心我哋。

C1：都有人喺背後講我哋，有讚亦有鬧。

S2：最辛苦係寫真影咗十幾個鐘，返屋企瞓半個鐘就返學，成日都冇精神。

C2：有次返學早走拍廣告，結果不停吹風同跳足個幾鐘，搞到病咗！

S3：以學業行先，試過廣告試鏡時間撞咗返學，結果冇去試鏡。

C3：盡量犧牲玩嘅時間，工作都安排喺星期六、日，暑假都有溫書。

S4：父母會提點我分配時間，但我好自律，唔使佢哋擔心。

C4：家人好支持！會同媽咪傾點着衫！

S5：最好係英文會話，宗教科係全級第二，最差就係數學。

C5：美術試過全班第一，係數學比較差！

S6：參加生物學會要行山，身邊個同學企唔穩推咗我落水，搞到我成身濕晒，畀阿Sir笑咗好耐！

C6：中一時做Model，但當時勁緊張又唔慣着高踭鞋，一上台就仆一仆！