祖兒摸黑騷邊唱邊抓

樂壇天后容祖兒前晚擔任音樂會嘉賓，首度在全漆黑中表演，令她大感過癮！她笑言摸黑唱歌特別自由，既可着便服做騷，又可偷偷地一邊唱一邊搔癢，認真搞笑！

祖兒、盧凱彤（Ellen）及人山人海大樂隊等前晚演出《暗中作樂》音樂會，吸引小儀、組合Lacee Lacey及港男李晉強等捧場。祖兒在完全漆黑的環境下，翻唱《萬水千山總是情》、《夜迷宮》及《細水長流》，加上周華健及鍾景輝等旁白，令觀眾都樂在其中，而祖兒亦勁High：「黑到完全睇唔到嘢，好彩有失明人士做領航員，當時真係覺得佢係我嘅英雄！」

完騷後，祖兒身穿便服及波鞋紮紮跳，興奮地自爆首度擺脫高踭鞋開騷，令她放鬆不少：「我第一次唔使着高踭鞋唱歌，本身帶咗歌衫嚟都冇換到！」事後她睇紅外線錄影片段，發現唱歌動作比平日放大20倍：「平時上台點都有啲拘謹同怕醜，今次黑到睇唔到觀眾，我直情喺入面痕！」

Ellen挑戰7級難度

另一邊廂，Ellen則表示開騷前，曾在家中戴眼罩彈結他練習，她笑說：「喺黑暗中彈奏有7級難度，只能夠靠我嘅手指去感覺囉！」她與祖兒均希望下屆能再參加，但笑言一定不可以搵陳奕迅（Eason）演出，祖兒笑說：「佢會無啦啦瞓着覺，一陣輪到佢唱又叫唔醒佢，仲傳出鼻鼾聲就弊啦！」