李思捷咀高海寧女友監場

阮兆祥、王祖藍及李思捷昨日到電台宣傳新片，祥仔踢爆思捷與高海寧拍咀戲時，緋聞女友春卷特別監場，令平日「寸寸貢」的思捷即時「笠水」無法還擊！

近日不停宣傳新片《勁抽福祿壽》的「福祿壽」阮兆祥、王祖藍及李思捷，昨日接受《巴巴閉邊個夠我查篤撐》訪問，分享拍攝花絮及玩踢爆。

期間，祥仔踢爆思捷與高海寧拍攝接吻戲時，其緋聞女友春卷特別現身監場：「不過唔知春卷平時同思捷係咪好激烈，佢（春卷）睇睇吓竟然瞓着咗！」身旁的思捷被踢爆後一臉Cool爆默不作聲，祥仔即打蛇隨棍上：「我就係知佢唔會講，所以我講！」

可頤拍場戲等九粒鐘

席上，三子興奮透露剛上映的《勁》片票房不俗，故已開始籌備開拍第二集。問到若票房大賣會否慶功？祥仔笑言若票房過千萬便交換「吻伴」：「我將盧覓雪讓出嚟畀佢哋咀！」祖藍聞言即抵死地說：「嘩！聽見都好飽，但我鍾意食膶腸飯（夠油膩）！」

其後，阮兆祥、張可頤與李思捷到港島區巡戲院謝票，被觀眾拉着合照，祥仔說：「思捷要開劇，遲吓我同高海寧謝票，為我帶嚟另一種開心！套戲幾好反應，觀眾好錫我哋，應該搞緊巴士巡遊入天水圍謝票，我都想去！」可頤則表示《勁》片重拾做新人的感覺：「等足九粒鐘拍咗一場戲。（向曾志偉投訴？）佢都冇乜參與！」

另外，高海寧昨日為名錶品牌行騷，身穿Tube Dress勁騷事業線，她表示今次酬勞很滿意：「品牌冇贊助我！（收過男士送名貴禮品？）冇！無功不受祿，睇吓咩節日！拍飲食節目就有得食鮑魚同魚翅。（咁飯局冇禮收？）同朋友食飯點會送好貴嘢。（公司安排呢？）都係慈善Ball。」她強調當年會考成績理想，父親曾送名牌袋：「我未收過男人送名貴禮品，但覺得鍾意一個人送乜都鍾意，最重要係心思，送我情詩都開心！」