o靚模變蟹痛蝕肉金

恒指昨日跌穿二萬點關口，創三年來新低，不少圈中人難逃厄運慘成蟹民，其中方中信更輸到「冇眼睇」，而多位瞓身「賣肉」拍寫真、接Job密密賺的o靚模，卻幾乎一鋪清，辛苦賺來的身家短短數天已蒸發一大截。

恒指由上周五開始，短短三個交易日急跌逾二千點。曾於08年股災蝕逾百萬元的方中信，今次同樣難逃一劫，前後共投資300萬元買股票的他，已作最壞打算。昨日身處內地的他接受記者電話訪問時冇厘神氣，甫開口即慨嘆：「真係冇眼睇，死無可死，剩番嘅唔多喇！」他又指「重災區」是收市跌穿3元的中國銀行（3988）：「我4個4買入，搞到唔想睇，當啲錢冇咗。」幸好他仍懂苦中作樂，打趣告訴記者現時不知如何是好，只能待在影棚門口發呆：「惟有繼續努力搵奶粉錢。」

出街暫不敢用信用卡

而經過寫真戰密密賺的一眾o靚模，不少亦因冧市蒸發身家，除了陳靜（DaDa）因投資錶行股損失五至六萬港元，輸掉五位數的趙哲妤更誇張，揚言不敢再帶信用卡出街：「依家啲錢責住咗，要慳啲使。」她對股票信心頓失，短期內不會再入市：「外幣都OK，打算趁低吸納澳元。」

同樣難逃損手的「混血E神」Monna（林宜芝），則不願透露實際損失數字：「一路買一路跌，跌咗四分三……但對個市都仲好樂觀，有撈底打算。」而許穎（Phoebe）則慶幸損失不多：「冇擺好多落去，冇影響心情。」

自稱投資經驗不多的台模趙彤，揚言今次「蝕到爆炸」，肉痛程度不輸方中信：「蝕咗十幾萬，基金股已經唔睇，因為呢啲嘢當長線投資。之前有朋友講過要放就一早放，但我冇做到，今次當係一個教訓。」同樣來自模界的傅嘉莉透露投資了六位數買股票，目前損失約兩成。

袁彌明蒸發60萬打和

至於向來懂生意之道的袁彌明，雖然這次損失約六十萬元，但幸好上半年在股市狂賺數十萬元，暫時打個和：「我揸咗啲期指，輸好多，好在一直有揸金銀對沖。」她有信心年底可追回損失，又預計恒指下望一萬八千點甚至更低，並表示會於恒指再下跌時分段吸納，待市反彈至二萬零六百點時平倉及沽貨：「我覺得今次大幅度調整後，會步入牛市。」而梁思浩今仗只輸少少，因於金融海嘯時買入大批股票，故現時是「怎蝕也蝕不完」。

文：影視組