吳彥祖心急生仔擬求助名醫

結婚一年的吳彥祖坦承有傳宗接代壓力，明示年內太太倘仍未能成功有孕的話，不排除夫婦倆一齊尋求名醫協助，務求令父親能目睹三代同堂！

吳彥祖（Daniel）去年四月與拍拖八年的Lisa S.在南非完婚，婚前已明言會積極造人的他，經歷整整一年仍「冇聲氣」。他坦承老婆也開始感到自責，可惜他沒有時間留港配合，難怪他說：「畢竟都36歲，生理時鐘都敲響咗，不過有BB唔係單方面嘅問題，我都有抽時間安慰老婆。等我拍完《王的盛宴》，就暫時唔會再長時間離港公幹，等大家多啲時間相處。」

圓老父抱孫夢

Daniel爺爺在他7歲時過身，吳媽媽生下Daniel時，吳爸爸已45歲，至今膝下只得他「一粒仔」，難怪心急想抱孫。Daniel為了早日圓父親的「三代同堂」夢，不排除稍後向醫生求助。談起當爸爸，Daniel形容比如今他當CEO還要困難，但已憧憬着日後的生活：「Lisa想生一個，我就覺得兩個OK，好想快啲生！因為唔想錯過小朋友嘅成長階段，起碼依家我仲陪到佢哋落場踢波。為咗佢哋可以喺正常嘅環境之下成長，會考慮返美國定居。」Daniel又透露有夫婦朋友努力了兩年仍無所出，打算放棄之際又突然意外有孕，故他決定放鬆心情，或許隨時會有「意外收穫」。