何潤東透視辣身舞 獻父母

人氣偶像何潤東前晚趁七夕情人節與組合AK開騷，前者施展渾身解數，自彈自唱晒才華，又透視晒肌與陳蕊蕊大跳貼身舞，並獻花送吻給台下的母親。

何潤東（Peter）前晚與台灣組合AK於九展舉行《Special Live in Hong Kong》音樂會，開騷前三子受訪，大晒廣東話的AK卻被Peter笑指似講泰文，Peter透露父母是香港人，能在港舉行處男騷心情特別興奮，不少親友更由加拿大專程來港捧場。

個唱上，Peter換上多個造型，還與歌手陳蕊蕊跳貼身舞，面對蕊蕊騷事業線，Peter亦不甘示弱透視晒腹肌，他穿回外套時打趣地說：「性感冇所謂，不過今日父母喺度，要保守啲，同埋媽咪怕我凍親！」為迎合香港歌迷，Peter及AK分別挑選張學友及黎明的名曲獻唱，Peter落台送玫瑰給歌迷慶祝七夕情人節時，識做地獻花感謝母親及送吻，而苦練結他多月的他，更自彈自唱經典名曲《新不了情》，贏得不少掌聲。

傅穎蕊蕊讚有才華

首次與Peter見面的蕊蕊直言被對方的魅力冧暈，而捧場的傅穎亦讚他充滿才華，問到是否理想對象？傅穎說：「呢類型係好多女仔嘅理想對象，希望有機會合作。（可能拍親熱戲？）入行未試過拍床戲，如果第一次搵個好對手，留美好回憶當然好。（Peter係好人選？）當然啦！」