陳庭欣臨別「抽波」激凸加冕

每年一度的港姐決賽昨晚塵埃落定，去屆冠軍陳庭欣、亞軍張秀文及季軍莊思明以性感打扮出席加冕。可能卸任在即，三位港姐谷盡「峰」芒，陳庭欣與張秀文分別身穿黑色斜膊長裙及米色Tube Dress，但莊思明去得更盡，騷胸之外還晒滑溜玉背，相當養眼！陳庭欣與張秀文傍實「六叔」邵逸夫，又不停撩他傾偈。

至於擔任「最上鏡小姐」評判的謝婷婷，身穿露肩性感晚裝裙，不比一班佳麗遜色。另一位大會評判周慧敏則以清麗打扮出席，清雅脫俗，而賭王四太梁安琪偕同兩名公子何猷亨及何猷君捧場。

陳豪被嘲識揀冠軍

此外，擔任大會評判的陳豪以「白馬王子Look」西裝亮相，賽前被問到三甲心水，他即公正地說：「唔講得！好多都好叻，修為同才藝都唔錯。」與選美冠軍特別有緣的陳豪，最近與前港姐冠軍陳茵媺傳緋聞，當被取笑最識揀冠軍時，他即時「走音」：「唔係！今年多好多海外佳麗。（準則係短髮同身材好？）睇整體表現，總之做評判好開心。」司儀曾志偉訪問他時又開玩笑：「最近佢近距離接觸港姐。」另外，評判之一名媛趙式芝席間暗示佳麗「僭建」：「呢啲好普遍！露台外牆都好常見！啲佳麗都好自然！（暗示邊個？）觀眾眼光好銳利嘅！（指得獎嗰四個？）你要問番佢哋！」