Bob男扮女裝撩交打

新城DJ林盛斌（Bob）外形搞鬼，口才了得，無論在電台開咪或在無綫主持節目都大受歡迎，他經常自拍Chok樣放上微博分享，表情多多，不過卻經常惹來「噓聲」連天！

Bob說：「自拍基本上係每日都會做，依家手機咁方便，又多影相Apps可以玩，得閒整大隻眼，得閒變吓髮型咁，完全冇難度！特別係近年結咗婚，有咗小朋友之後，個女霏霏會陪我一齊玩，自拍做啲得意豬嘴樣、扮鬼臉咁樣，留番個回憶咁，都幾開心吖！不過坦白講，我啲相就比其他Artist特別少少，你明白我個人本身外形玉樹臨風，基本上放親啲相上微博，都會惹起一片哄動，大家主要都係讚我好靚仔、勁靚仔咁樣，有時真係聽都聽到麻木晒！」

提到最大回響的一輯自拍照，Bob說：「都係我扮女人啲『靚相』，唔係人人都咁Proud of自己個女人樣，我唔係淨係外表女人，仲要扮埋啲表情，嘟嘴、飛吻、咬手指，主要係因為我冇偶像包袱嘛！個個歌手朋友睇完張相都話想打我，嗰排放相上網，真係會擔心我個人人身安全呀！哈哈！見大家睇完我啲相，開心咪好囉！做主持有時都係想帶畀大家歡樂啫，最緊要笑得開心！」