謝天華Chok住條戲

娛樂圈Chok人何其多，謝霆鋒夠Chok吧！Chok彷彿深入他們的骨髓，不論對着鏡頭還是熟睡都會「Chok番兩手」。要數霆鋒接班人，一定不能不提「Laughing Gor」謝天華！欣然接受「Laughing」這個朵，天華命中注定就要Chok，連Chok慣的黃宗澤也自愧Chok輸天華，印證他在這個範疇的地位如何神級！講到如何Chok，天華興奮極了，兩眉也曉得交戲緊蹙，連嗓子也韋家晴上身說：「我覺得Chok唔係詆毀字眼，反之係褒揚，唔係人人都有資格Chok，要Chok得起，而又做到嘅，我覺得香港唔係好多人。」

Chok碟豬扒飯

天華極之認同Chok是信心的表現：「畀人話Chok又點？我就係咁，太Enjoy喇！冇自信點Chok都Chok唔出樣，呢啲唔係造作，我以前事業未有成績，任憑點Chok都係徒然。其實Chok呢個形容詞近一年先多人用，之前係叫潮、型、In，隨着時代變遷，就變咗叫Chok，呢類字眼其實意思差不多，真係o架！大家可以諗吓我做Laughing嗰陣有冇畀人話Chok先，潮語嚟啫！」

說到這裏，天華的潛台詞已經浮面，一句到尾，就是人紅自然Chok，他說：「真o架！我從來冇講過話自己Chok，都係人哋畀面。我工作上對自己好有信心，人哋就有咁嘅感覺。Chok呢個意思真係乜都得，Chok聲又得；Chok樣亦得；Chok碟豬扒飯都得……得咗！」

知足唔貪錢

天華Chok得起，全拜「Laughing Gor」所賜，彷彿演甚麼角色，天華都是Laughing化身：「係！我認！自己真係好享受人哋嗌我Laughing，極之令人入腦，行行吓街人哋會叫我呢個名，去買餸老闆娘見到我又會計平啲，真係幾着數！原來依家Laughing就等於謝天華，我唔介意所有人一直係咁嗌我！」

講到尾，人紅自然錢多，錢多自然嗜好多，對於錢這萬能又萬惡的東西，天華有這樣闡述：「錢，真係冇人會嫌多、冇人會唔鍾意！不過我覺得夠使就好滿足，千祈唔好太貪，貪太多會好易腐敗，所以錢另外一面就係邪惡！」

患難夫妻情

鋒芝婚變，霆鋒夠Chok吧！可惜也Chok不出完美婚姻！而天華與老婆Tina結婚6年，當中遇過不少風雨，他坦言夫妻相處不是靠Chok，而是在乎坦誠：「天下有邊一對夫妻冇鬧過交？佢哋遇到問題要講出嚟，唔好隔夜，我同Tina即使鬧到好面紅耳熱，最後都有一方去氹番對方！」可惜他死也不肯講如何氹老婆，總之就是肉麻！

服裝：TWIST@中環