Jeana淆底拒驗明證身

o靚模何佩瑜（Jeana）被指報細年齡，仍然堅持不出示身份證來澄清，還死撐澄清只會令事情更複雜，她不會做不必要的事，顯得相當避忌，與平日牙尖嘴利的寸嘴作風大相逕庭。

傳虛報年齡、本是31歲但扮作22歲的Jeana，昨日出席活動時表示已作回應及發誓並無虛報年齡，所以再做任何澄清都沒有意義。提到她的死敵葛民輝Icon Girl許穎（Phoebe）日前拿出身份證來證實年齡，Jeana說：「依家唔係路障查牌，唔係停車熄匙查身份證。我遲啲會考車牌，到時考到畀大家睇大家就知！（你其實幾歲？）我今年22歲！我好後生，唔知點解人哋會話我31歲！不過好彩係話我31歲，而唔係13歲，如果唔係就冇得拎政府派嗰六千蚊！（突然收口？）我覺得愈澄清件事會愈複雜。」她又強調並非害怕和逃避。

預咗畀晒人知

當追問為何不澄清及突然低調時，Jeana死撐說：「我出嚟預咗咩都會畀人知，澄清只係一時，唔可以每日都喺度澄清。（你從來冇拎過任何證明出嚟？）我覺得唔需要咁介意人哋點講我，我自己有自己嘅諗法，唔想有啲咩嘢直接影響咗我去做啲不必要嘅嘢！（Phoebe做不必要嘅嘢？）我唔講喇，同佢又唔係熟。（你平時好牙尖嘴利？）我只係對事不對人，我個世界唔係得佢哋。（叫公司幫你發聲明澄清？）呢樣可以傾吓。」