Jeana每周驗兩次保證堅料

周圍撩是鬥非的o靚模何佩瑜（Jeana），被其他o靚模圍攻，逼她發誓否認整容及隆胸，但仍難平眾怒，然而在一片怒火中，她再出招寸死敵「悉尼老鼠」，又自稱每周驗胸兩次，保證堅料。

何佩瑜、Hidy、松岡李那、王梓軒及黃榕等昨日出席「3香港」智能手機活動，對於日前在受壓情況下發誓冇整容，即被質疑發假誓，Jeana無奈地說：「誓都發咗！咁嚴重嘅嘢都做咗，其實可以輕鬆啲。」問到會否收口免再被圍攻時，Jeana即發揮寸嘴本色，明踩其他o靚模為不知名閒人：「嗰啲悉尼老鼠（識你老鼠）嗰班朋友，我唔會再理佢哋做咩。（驗明正身？）自己每星期都驗兩次，我知自己係真材實料。我唔係怕，而係呢個話題好悶，唔係人哋話驗咩我就驗咩，唔通話我係變性人，我就去驗DNA咩？我有時間都做有意義嘅嘢啦！」

拒讓Hidy驗胸

Jeana即場被問到能否讓Hidy驗胸時，她反應甚大地說：「我唔會周街畀人驗胸，否則會嗌非禮！佢又唔係我男友。（男友會唔會覺得你假？）唔會，假就唔會鍾意我啦！佢鍾意我唔係有身材，而係有內在美！」她又自爆近半年收入豐厚，已賺了六位數字，而Hidy則說收入有增加，並透露最近因拍劇而跟楊盼盼學功夫。